Vawleipi nih a hnih dihtu le abuaitertu Covid-19 zawtnak cu Hakha khuapi zongah a hung phan ve cang. Covid-19 zawtnak ngeih cu kan duh ruangah si loin vanchiat ruangah tu ah a si deuh. Hakha Peng Tiphul khuami ka far nu kum 18 nute cu Myanmar ram Ngandamnak Zung nih April 29 zinglei suimilaam 7:00 ah COVID-19 positive a si, tiah thanhnak a tuah i Hakha sizungah thlopbul dingin chiah a si cang.

Cu lawng si loin Hakha peng Tiphul khuami minung 42 hna cu Quarantine chiah dingin lak ṭhan an si tiah Tiphul khuami pakhat nih a faebook cahmaiah thanhnak a rak tuah. Minung 42 lunghrinhmi hna zong result ṭha te a chuahnak hnga thlacamnak in bawm cio hna usih. Zawtnak timi cu aho cio paoh nih ton kan ton duh hna lo. Asinain kan hrial khawhmi a si fawn lo. (Tct Aachin)

Tutan kan farnu thawngpang kan theihmi cu lungthin a nuam hrimhrim lo. Amah hrimhrim zong a sining dirhmun ruah tikah Minote a si tikah zaangfak ngaingai zong a si. Asinain kannih cu a nungmi PATHIAN sertu PATHIAN peih kan ngeih cu thlacamnak in bawm cio hna usih! A dam kho lomi zawtnak a si lo a dam hrimhrim lai Pathian sinah thlacamnak in bawm rih ko hna u sih!

Tiphul khuami Quarantine ah chiah dingin lak ṭhanmi hna minung 42 hna zong ngandamnak tein a um i result ṭha thawngpang ṭha te arauh hlanah kan theih khawhnak hnga thlacamnak in bawm rih ko hna usih. Zeidang thil ti nak in kan bawmh khawh hna lo hmanh ah Khrihfa zumtu hna kan ibawmhnak a sunglawi bikmi cu pakhat le pakhat thlacamnak in i bawmh hi a si. Kan farnu te zong damnak tlamtling hmu hram ko seh!

Tiphul khua lockdown tuah le tuah lo kongah The Hakha Post nih a ṭialmi; Minister Pu Soe Htet nih a chimmi cu” Tiphul khua Lockdown an tuah ding le tuah lo ding kong ah, “Lockdown tuah ding le tuah lo ding kong ah 2020 April 29 ah Cabinet Meeting kan thu i, hi meeting ahcun Lockdown tuah ding in bia kan chah mi a um rih lo. Amah he aa tawngtham mi Kalay lei le Mandalay lei tiang kan kawl lio a si. Amah he aa tawngtham mi le a tlongleng ti mi hna an sining zoh in bia kan chah te lai. Ruah lo pi zong in Lockdown tuah khawh a si, thil sining kan zoh hmasa ta rih lai,” tiah a chim. Credit: The Hakha Post