Thitumnak An Tuah Hlanah Coronavirus Ruangin A Nunnak A Liam Mi Dr. Peng Yinhua Konglam Cu Ngaihchia Tuk Hringhran: Zeitluk in dah a nupi ding nih a hei tuar lai mu. Kum zabi chung i zawtnak hri ttihnung le minung caah zawtnak kai a rangbik timi ah ruahmi Coronavirus zawtnak ruangin Wuhan hospital doctor Peng Yinhua (29) cu nupi ngei ta manh loin a nunnak a liam.

Dr. Peng Yinhua hi Wuhan’s Jiangxia District-a People’s No 1 Hospital-ah covid19 dam lomi hna a zohkhenhnak ah amah zong cu covid19 nih a tlunh i, January ni 25-ah khan siizung ah admit asi i, January ni 30 ah khan Wuhan Jinyintan Hospital-ah tthial asi. Cu ti cun cawn ningani, February ni 20 zan sml 9:30 ah a nunnak a liam tiah Hospital official news agency Xinhua nih a langhter.

Dr Peng hi anmah China Kumthar (New Year) chung dinh caan an hman lio ah nupi ngeih dingin timhlamhnak a ngei. Sinain Coronavirus hrileng mi ruang le a zawmi hna zohkhenh an herh ruangah a nupi ngeih caan cu a thawn i, sawmnak ca a tuahmi hna zong cu pek rih loin amah office a chiahchung rih tiin Xinhua news nih cun a langhter.

Dr Peng thihnak kongah amah hoikom le dawtu hna thinlung nih a celh cio lo i, social media an sian lonak le amah zun in an in tuarnak kong cu an chim cio. Mah zawtnak ruangah China ramchung ah minung 2,200 leng an nunnak a liam i, hi zawtnak a ngeimi minung 75,000 leng an phan cang.

February thla hramthawk ah khan vawlei pi theih in hi zawtnak thawng a aupi hmasa bik Dr. Li Wenliang kum 34 cu a nunnak a rak liam cang i, Dr Liu Zhiming Director, Wuchang Hospital cu tuzarh cacawn nithumni zingah khan a nunnak a liam fawn. China cozah nawlngeitu hna chimnak ahcun medical lei rianttuantu minung 1,700 nih hi zawtnak an ngei ti chim in, a tam u cu hi zawtnak a chuahnak hmun Central Hubei province i a ttuan deuhmi an si hna,”tiah an langhter.