Ralkap nih uknak an lak hnu cun zezong te buainak lawng tein a khat cang ko. Tutan ah rakap nih Myanmar ramchung Internet hman ningcang cu bia tak tein rengh ding ah ralkap cozah nih “Cyber Security Law” a dang a timh tiah VOA nih a langhter. Hi kongah Myanmar ramchung thiamsang hna nih “Hi upadi hi ramchung thawngzamhnak rikhiahnak le upadi a buarmi pawl tlaihkhihnakding ah an suaimi a si ko,” tiah an chim.

Ralkap cozah (State Administrative Council) nih a dang tein a suaimi “Cyber Security Law” ah biapi in zulhphung phunthum an ser. Pakhatnak: Myanmar ramchung Internet Service a petu company hna nih Internet a hmangtu mipi i an konglam (Data) cu ralkap cozah nih an theihnak hmun ah kumthum chung an fim lai.

Pahnihnak: Ralkap cozah nih Internet hmangtu hna konglam (Data) cu a herh a ti caan paoh ah upadi ning in Internet Company pawl sinah halnak nawl le laknak nawl a ngei lai. Pathumnak: A cunglei upadi hi internet Company pawl nih an buar a si ahcun kumthum tiang thongthlak khawh le Ks ting 10 liamter khawh an si lai timi pawl hi an i tel, tiah VOA nih a langhter.

A cunglei upadi a dang cu remh a herhmi pawl remh i ralkap sinah February 15 hlan ah ap tthan ding in Myanmar ramchung internet Company pawl sinah an theihternak ca an pek hna tiah VOA nih a langhter. Atu bantuk in ralkap cozah nih Cyber Security Law serhram a thawk tikah Myanmar ramchung zatlangbu hna nih hi upadi nih hin nuhrin covo a buar pin ah zalong tein chimrelnak nawl zong a buar tiah an langhter. Source: VOA

Relchih: Kawl Ralkap hi kan ttih tluk in an rak thawng lo. Tulio bantuk caan ahhin an der khun. Kawlram Mipi dihlak kan von cawl ahcun an lau taktak. Cun tulio bantuk mass demonstration ahhin Hriamtlai pawl nih caan ttha an lak sual lai timi zong an ttih taktak lai.

Biatak tein civil war chuak sehlaw anmah Ralkap chung lila, Battalions / Military units tampi cu an meithal her in Mipi lei an ttang kho timi zong an ttih rih fawn lai. Cucaah, Min Aung Hlaing hi, atu aa hngilh kho ti lai lo. Tulio caan hi Kawlram pi aa thleng thainak ding caah “golden chance” a si tiah ka ruah.

Cucaah si kho sehlaw tiah ka saduhthah cu, Hriamtlai dihlak, CNF/A- KNU- KIA tbks vialte hmun khat ah ifun kho vial dih hna sehlaw mipi hnulei ah ready in dirh cang hna sehlaw Cutin an ifun khawh ahcun Libya 🇱🇾 ram ah sandahpiah pawl nih Muammar Gaddafi cu zu kua chung tlaih in an va tlaih bantuk in Min Aung Hliang zong hi aa thuhnak kua chung ah zu tlaih in va tlaih khawh lio caan a si tiah ka ruah.

Cucaah thachiat ding a si lo. Naite bachim ah a von lang ahkhan a mit kua a tla viar cang si khaw raltha tein kan fight chin thluahmah ko ahcun kan tei hrim lai. Cattialtu: By Zasang Cinzah