Thinphang dai lo si cang: Rev. Ṭial Maung nih Pu Fela kong a chimmi cu khuaruah ngai a si-VIDEO
Naite ah Sangau YLA kutin a thimi Kyaw Kyaw thihnak kongah Chungkhar lei nih mipi sinah thawngfiang an hun chim cang. YLA nih kan kut a thi lo ti an i pheh lengmangnak le Kyaw Kyaw a umna Pu Fela nih YLA kut in kan thi ko tiah a timi a bia a letnak kong mipi sinah a tanglei bantukin fianternak an von tuah.
“Atu hi a caan zong a hung ngai cang nain, atu tiangah Sangau Mino leiin siseh, Sangau khuami lei zongin zeihmanh kan sual kan palhnak tinak zong a um lo. Cun, ngaihthiamnak zong a um lo. A caan zong a sau (kal) ngai cang i kanmah zong kan lung a ṭha hrimhrim ti lo. Cucaah, kan sining poh in si cang usih, aherhning paoh in kan cawlcang cang lai.
“Kan miphun hna zong nih ṭan kan lakpi ulaw, aherhning ka cawlcang lai. A caan kan zoh lengmang i nihinni tiang Media nih an ṭialmi tehna, bia an hal hnanak zongah an sual palhnak an i phuang duh lo i nihinni tiang thiam an i coter peng i 100% ah 100% an thah ti kan fiang fawn ko.
“An khuami zong pehtlaihnak kan ngaih lengmang hna tikah anmah an si ko an lengmang bu i nihinni tiang an sual an i phuan duh lo i thiam an i coter lengmangmi hi kan ruah tikah kan lung a fak i aherhning paoh in vawlei pumpi theih in hi thil hi kan kalpi cang lai tiah chungkhar lei cu kan i tim cang ko,” tiah Rev. Ṭial Maung nih a chim.
Kyawkyaw a umnak Pu Fela a bia a let timi kongah bialehnak
“Kanmah he cun kan i chawn ko. Pu Fela hi keimah he zong kan i chawn i Kyawkyaw a nu he zong an i chawn ko. Asinain, kanmah he kan i chawnh ahhin cun a bia a let hnuah a si. Sangau ummi mi tampi kan pehtlaih cang hna i, aruak an tlunpi ahhin zeitindah a thihning tiah (Pu Fela cu an hal) kan hal i YLA kut in kan thi ko tiah Pu Fela nih voikhat voihnih lawng hmanh si loin voi tampi a chim tiah khuami lila nih an chim.
“Congthia khuami Pu Ṭuan Khar (Kyaw Kyaw nu i an khuami taktak Congthia mi) Kyaw Kyaw ruak la dingin kan fialmi sin zongah YLA kut in kan thi ko tiah ṭha tein arak langhter cang. Sangau khuami theih in a chim cangmi sinain, a donghnak ah a phehmi ṭhanmi a si ti hi fiang tein kan hngalhmi a si,” tiah Rev. Ṭial Maung nih cun a chim chap. VIDEO
Note: Hi thawngpang cu mual a kan liam taakmi Kyaw Kyaw hringtu a nu le UPC Pastor pa CM page nih biaruahnak an tuahmi hna chungin kan rak lakchinmi a si.
Copyright © Chin World News Evening|Salai Van Lahnin