Thiang Thlarau Khah Nun- Rev: Benjamin Khamh Bawi

Thiang Thlarau in khah le Thiang Thlarau in khah tik i zumtu nun ah a langmi kong he pehtlaiin tlawmpal te langhter ka duh. Mi tampi nih Thiang Thlarau khahnak kong he pehtlaiin Galati 5:22, 23 chung i Thlarau Theitlai kong deuh an chim cio. Hihi a palh lo nain Thiang Thlarau khah ning phun hnih a um tihi kan hngalh chih a herh. Cucu Lamkaltu Cauk, Biaceihtu Cauk le Samuel Uk Khatnak 19 chung hna ah fiang tein kan hmuh khawh hna. Thiang Thlarau khah hi phun hnih in a um.

1.Chikkhat Te Thiang Thlarau In Khahnak : Minung Sinak Aa Cawh Tawnmi Thiang Thlarau Khahnak

Minung sinak aa cawh tawnmi Thiang Thlarau in khahnak nun hi mi tampi nih kan hngalh khawh lomi le kan sawisel tawnmi a si. Mah Thiang Thlarau he khahnak hi Khrihfa Nun asiloah Zumtu Ziaza ah langmi Khrih Nunzia (Khrih Dawhnak) langhnak nakin atu bak i a herhmi Pathian rianttuannak caah asiloah Pathian sunparnak langhnak caah a si deuh tawn. Saul le a ralkap cu Thiang Thlarau in an khat (chikkhat te lawng), Pathian minung David luatnak le David Thimtu Jehovah sunparnak caah a si. Saul nun ah nun dawh a lang hrimhrim lai lo nain chikkhat te Thiang Thlarau he a khat i Thlarau lei holh in a holh cukmak . (1 Sam. 19).

Biaceihtu Cauk na rel ahcun Thiang Thlarau an cungah a tlung i Thiang Thlarau in an khahnak kong a tu le tu in na hmuh khawh lai. Cuhna cu, Gideon, Jefthah, Samson le a dangdang hna. Lamkaltu Cauk na rel ahcun a tu i ka chim liomi, “Chikkhat te chung Thiang Thlarau in khahnak,” hi a tu le tu in na hmuh ko lai. Biadang in chim ahcun Thiang Thlarau chung i hnimnak zong a si. Thiang Thlarau chung i hnimnak an co lio bakah Thiang Thlarau in an khat i Thlarau lei holh in an holhnak le Thlarau lei Cawlcanghnak tete a lang lengmang. (Lam. 2:1-4, 4:31, 8:27, 10:44-48, 19:6).

Chitkhat te Thiang Thlarau a khat duakmi hna khi Thiang Thlarau in an khat zungzal hna lo. An khat caan te lawngah an khat hna. Cubaktuk Thiang Thlarau he khahnak cu nihin kan chan Khrihfabu chan zongah hmuh ding tampi a um ve. Cun mi pakhat nih Thiang Thlarau in khahnak a co ko lai nain amah minung sinak aa cawh kho. Thiang Thlarau cu Ti he tahchunh a si i Tihna in Ti Thiangte a rung luangmi kha Bel in kan donh tikah Bel a thian lo ahcun Ti Thiang te a rung luangmi kha Bel i a khah tikah Tinawi in a khat ko lai. Mah a khatmi ti kha Ti Thiang te a si ko nain Bel a thian lo caah Tinawi in a khahnak a si.

Hrai pakhat chungah Lungchia law a thiang mite ti va dawng hmanh Hrai chingah ti thiang a khat ko lai nain Lung he a khatmi Ti Thiang a si. Mi pakhat cu a chuahkeh pi mi thluak a tlawm deuh tikah Thiang Thlarau in khat hmanh sehlaw a thluak a tlawm deuh caah Thiang Thkarau kha a fimnak nain a hrut deuh rua tiawk tlakin a lang ko lai. Sifak pa sinah a khatmi Thiang Thlarau cu midang hmuhnak ah a niam tukmi Thiang Thlarau khahnak ah ruah khawh a si ve. Mi puar pakhat cu Thiang Thlarau in a khat ko lai, sihmanh sehlaw a puar tuk caah a mah ah a khatmi Thiang Thlarau kha a puarmi hna a lo ko lai. (Chim ding tampi a um rih).

Cu chikkhat te Thiang Thlarau in khahnak cu pumh lioah, thlacam lioah, hlasak lioah, Baibal rel lioah, thawngtthabia ngaih lioah, midang nih kan caah thlacam lio, le Bawipa nih a herh a ti caan paoh ah zumtu cungah a rung um kho zungzal mi a si. (Hitihin ningte hin a si hrimhrim awk a si ti khawh a si lo).

2. Thiang Thlarau In Khah Peng Nun

Zumtu lawng nih si loin zumlotu hna zong nih zumtu kan nun i hmuh an duh bik ciomi nun cu Thiang Thlarau in a khat peng mi nun hi a si. A cunglei i tahchunnak ka chimmi kha vun pehtthan ka duh. Hrai asiloah Bel a hnawm/thurmi in ti thian te kan donhmi kha a voi khatnak i a khatmi cu a thiang lai lo nain voi tampi a siloah caan sanpi kan donh ahcun thi thiang nih a thianh thluahmah lai i a hnu ahcun ti thiang nih a thei lai i a thiangmi ti lawnglawng a khat ko lai. Cuve bantukin zumtu nih voi khat lawng Thiang Thlarau in kan khah kha i rinh ding a si hrimhrim lo, a tthemh lengmang kan hau. Cunglei in Thiang Thlarau toih lengmang kan herh.

Biakam Hlun chan ah Saul cu voi khat lawng Chiti Thuh a si i David cu voi thum Thuh a si tikah an nun aa dawh le dawh lo kongah siseh, teinak an hmuhnak kongah siseh, an ram a kauh ning kongah siseh, an i thlau tuk timi kan hmuh khawh. Biakam Hlun chung i Chiti Thuh/ toih kha Biakam Thar chung i Thiang Thlarau toih he aa khatmi a si. Voi tam deuh deuh Thiang Thlarau toih le Hnimmi cu voi khat le voi hnih te lawng a comi nih cun thlarau ram ah tluk khawh peng a si lo.

Thiang Thlarau in khahnak kongah cun a chim thiam, Baibal in fianter thiam lei si loin nun in hmuh tawnnak lei tuah a si deuh. Thiang Thlarau in khah nun timi ah nunzia dawh timi aa tel ve ko nain nunzia dawh paohpaoh khi Thiang Thlarau in khah a si thlu lem lo. Thiang Thlarau in khah nun timi cu minung thi le sa nih a ukmi kha Thiang Thlarau nih a uk caah Thiang Thlarau hruainak tang bakbak ah nun khi a si. (Rom. 8:14; Efe. 5:15-18; Fil. 4:8, 9; 2 Kor. 3; Gal. 5:22, 23).

Credit: Rev. Benjamin Khamh Bawi