Ye Oo- Chaung Oo Le Myaing Kahdohnak Ah SAC Ralkap 50 Hrawng An Thi: Tanintharyi ramṭhen, Yephyo peng Sagaing ramṭhen- Chaung Oo peng le Magwe ramṭhan, Myaing peng ah kahdohnak a chuak i, SAC ralkap 54 an thi tiah PDF nih cathanh an chuah. Tanintharyi ramṭhen, Yephyo peng Watchaung khua hlei pawng ah SAC ralkap motor cu PDF nih July 31 zan sml 7:30 hrawng ah kan kah hna i, ralkap 30 hrawng an thi, tiah Dawei Guerrilla Revolutionary Force (DGRF) nih an thanh.

SAC ralkap Vigo motor 4 vawlei phorhnak motor 1 cu PDF nih bomb an puahhnawh caah Vigo motor 1 le vawlei phorhnak motor cu an rawk i an dir. Cu lioah 40mm le hriamhme in an kah hna caah SAC ralkap 30 hrawng an thi, tiah theih a si. Cu kahdohnak ah cun Dawei Guerrilla Revolutionary Force -DGRF, Launglone People Defence Force – LLPDF le T-PDF hna i bawm in an kah hna. SAC ralkap nih pawl cun Khamaungchaung le Ekani khua an duah i in 5 a ciam, tiah theih a si.

Chaung Oo peng Ngayan khua nichuah lei ah August 2 zing sml 6:45 hrawng ahkhan Chaung Oo in Myinmu lei a kalmi SAC ralkap 70 cu Farmers Revolution Force le Myaing PDF nih bomb lung 6 in hmun thum ah an puahhnawh hna caah ralkap 19 an thi, tiah theih a si. Myaing peng Uyinma Zayet pawng ah August 1 zing sml 9:45 hrawng ah SAC ralkap cu bomb kan puahhnawh hna i ralkap 4 an thi, tiah Pah Kah Pha nih an langhter.

Monywa-Mandalay Lampi Ah Sentari Cawngmi SAC Ralkap Pawl Cu Kah An Ton Caah 20 Hrawng An Thi: Sagaing ramṭhen, Monywa-Mandalay lampi thluan in a kalmi SAC ralkap motor 37 cu humhimnak lak ding in hmunhma an lak lio ah Chaung Oo PDF nih, hmun 5 in bomb kan puahhnawh hna caah SAC ralkap 20 hrawng an thi, tiah Chaung Oo PDF nih cathanh an chuah.

Nizan August 2 zinglei ahkhan SAC ralkap 60 hrawng cu motor 2 in Monywa in an chuak i, Monywa-Mandalay lampi thluan ah ralkap nih sentari an cawngh. Khinmon le Aungchanthar karlak ah sentari cawnghnak hmun 3 cu, bomb lung 3 in kan puah hna caah SAC ralkap 6 hrawng an thi. Aungchathar le Chaung Oo khua karah sentari cawnghnak hmun hnih cu bomb kan puah ṭhan caah ralkap 14 an thi ṭhan, tiah Chaung Oo PDF nih cathanh an chuah.

Cu pinah Sagaing khuapi in Monywa lei ah a kalmi SAC ralkap motor 37 cu bomb in kan puahhnawh hna i, ralkap a thimi zat hi kan fehter kho rih lo, tiah Chaung Oo PDF nih an langhter. Cu kahdohnak ah cun Chaung Oo peng Pah Kah Pha nih an hruai hna i, Chaung Oo PDF Company 4 le 1 ralkap nih an kah hna, tiah theih a si.

Myinmu ah SAC Ralkap Motor Bomb Puah A Ton Caah Ralkap 7 An Thi: Sagaing ramṭhen, Myinmu peng ah SAC ralkap motor cu ZERO Guerrilla Myinchan le ṭangrual phu hna nih nizan August 2 chun hnu sml 2:40 ah bomb kan puahhnawh hna i, ralkap 7 an thi, tiah ZERO phu nih cathanh an chuah.

Kan puahhnawhmi motor hi ralkap nih an i citmi lak ah minung an tam biknak motor a si i, Wanpih le Alakapa khua karah kan puahhnawh hna i, ralkap 7 an thi. Hliamhma pumi cu Myinmu sii-inn ah an chiah hna tiah ZERO Guerrilla phu nih an langhter. Cu kahdohnak ah ZERO Guerrilla- PKDF- DBBF le G4G PDF hna i bawm in an kah hna, tiah theih a si. Credit: The Chin Post