Timit Kahdohnak Ah CDF-Hakha Sniper Nih SAC Ralkap 3 A Thah Hna: Chin ramkulh khualipi Hakha pawng Timit kahdohnak ah SAC ralkap pawl cu Chin hriamtlai phu nih an kah hna, tiah theih a si. Cu kahdohnak ah cun CDF-Hakha sniper nih ralkap 3 a thah hna pinah seh meithal (Machine Gun) tlaitu pa zong an thah caah ralkap cu um awk hngal loin an tuah hna.

Chin hriamtlai lei in a thimi le aa hliammi an um lo, tiah theih a si. Nithum chung kahdohnak cu Hakha Campaign For Justice nih a ti bantukin hin an langhter. August 2: Hakha le Thantlang karlak ah kahdohnak voi (2) a cang i Ralhrang lei hliamh an si.

August 3: Chun ni tlak i kahdoh ah kan hmuithiam ‘CDF-Hakha sniper’ nih Ralhrang 3 a thuat hna. Ralhrang lei Machine gun a tlaitu zong hrilh a si caah an con ngai ngai. Rungtlang lei in hriam nganmi in bawmhnak an pek hna. Cu ni ah Ralhrang 4 an thi. August 4: Cawbuk Gate ah zing 10:45-11:06 caan karlak ah va kah a si i Ralhrang 1 a thi, 3 hliam an si.

Timit lei cu ‘meter 200’ tluk ihlat lawng in kahdoh an si i Ralhrang 8 an thi. Cun an buk ah va kalhnawh in va kah an si chih caah hliammi an tam ngai ko. Kan hmuithiam ‘Sniper’ nih a hrilhmi hna (1) a fiang, pahnih a fiang rih lo. Rungtlang in le Thantlang lei in hriamngan in bawmhnak an pek hna, tiah CDF-Hakha nih an thanh. Credit: The Chin Post

Ca biacdang: Mizoram Ah Myanmar Mi Pakhat Cu Kyats Sing 5000 Leng Man Bing He An Tlaih! India ram, Mizoram ramkulh khualipi Aizawl khuapi ah Chin miphun, Tedim peng Darkhai khuami Khup Za Tung, kum 42 sin in 428.04 gram a ritmi bing cu August 4 ah Mizoram palik le Assam Rifle nih an tlaih, tiah theih a si.

An tlaihmi bing cu Rupees sing 214 man a si i, Myanmar phaisa in sing 5770 leng a si. Myanmar ralzam hna a cohlangtu Mizoram ah Myanmar ram in rithaisii phorh lo ding in Chin hriamtlai phu, media le zatlang bu hna nih phihkhamnak an tuah ko nain atu le tu Myanmar mi hna sinin rithaisii an tlaih lengmang.

Atu bantuk ram boruak chiat lio caan cu caan ṭha ah i lak riangmang in phung lut lo sii zuar hi Mizoram um, Myanmar mi hna ca ah himlonak le thil ṭha lo a chuahter khawh tiah chimceih ngai a si. Mizoram i rithaisii tlaihnak kong ah hin a cawtu taktak le a ngeitu taktak nakin an kuttang ah a phortu hna cu an tlaih deuh hna, tiah theih a si.