Myaing PDF nih SAC ralkap pawl nihnih chung bom an puah hnawh hna i 8 an thi. Cuka hmunhma ah kuan, bom le raltuknak thilri pawl kan lak khawh tiah Myaing PDF nih August 16 ah a thanh. Myaing peng, Tengyi khuate le Tat khuate karlak ah August 15-16 tiang Myaing PDF nih SAC ralkap pawl bom an puah hnawh hna.

August 15 ah eidin a rak puttu ralkap mawṭaw 2 cu bomrap an puah hnawh hna i SAC ralkap 1 a thi 3 an i hliam, cun a bawkmi SAC ralkap pawl an lau tuk i thingkung tang an i thuh lioah bom an puah hnawh ṭhan hna i SAC ralkap 3 an thi, 1 aa hliam tiah an thanh. August 16 zongah August 15 kahdohnak hmunhma ah hmunhma a lami SAC ralkap pawl cu bomrap an puah hnawh ṭhan hna i SAC ralkap 3 an thi, 2 an i hliam tiah a thanh.

Cuka hmunhma kahdohnak i a thimi SAC ralkap ruak char ding in a raami SAC ralkap pawl cu August 17 ah bom an puah hnawh ṭhan hna i SAC ralkap nih a pawngkam ummi dawr zuartu 2 an thah hna tiah Myaing PDF nih a thanh. Cucaah mipi hna nih SAC ralkap an umnak he hlatpi ah um ding in Myaing PDF nih a thanh. Credit: The Chinland Post

Thawngpang dang: Thing, rua hna phungning loin ahnak, Dynamo in nga tlaihnak pawl hna kan hmuh caah khamnak le ralrin peknak voi tampi a zul lomi cu phungning tein a ziizut nan si lai tiah Chin ramkulh, Kanpetlet mipi uknak phu nih August 16 ah an rak thanh. Kanpetlet peng mipi uknak phu nih 2022 January thla ah rak tuahmi pengkip meeting biachahnak in saram phun 8 cu kah le tlaih lo ding tiah biakhiah a si.

Cu bantuk in Kanpetlet peng chungah a ummi tiva hna ah bom puah, pipe zam, riihai sii tukdannak, Dynamo in nga tlaihnak hna tuah lo ding le thing, rua zohkhenhnak hmunhma ṭha tein riikhiah hnuah phungning loin thing ah le chuahnak hna a can lonak hnga a dotdot in nawlpek le tawlrel a si tiah August 16 ah ralrinnak cathanh an rak chuah.