Mizapi Sin Ah Lunglawmhnak le Forhfialnak: 1. A ra lai mi November 8 thimnak ah Hakha peng le Thantlang peng nulepa siseh, Peng dang ummi Chin miphun nulepa hna nih CNLD caan a si cang, Chin miphun nih cun Chin Party kan thim ko lai tiah thawng kan theih ca ah nan dihlak cung ah lunglawmhnak tampi kan ngei. Pathian thawng le nanmah thawng in teinak kan hmuh ding hi a si.

2. Tutan thimnak ahcun Chin Party CNLD lawng si lo in tlangcung mi ahcun anmah tlangcung mi Party cio nih an ram ah teinak an hmuh lai i Kawl rawn ahcun NLD nih teinak a hmuh ve ko lai. Zei ca tiah kan ti a si ahcun (a) Tlang cung mi ramkheel lei fimthiam hna le Kawl mi ramkhel fimthiam hna nih Tlangcung mi nih cun Tlangcung Party ah thimnak pe cio ding ah faakpi in forhfialnak le aupi nak an tuah.

(b) Ram pi huap remhdainak minsen a thu mi tlangcung mi hriamtlai hrimhrim nih mah le miphun Party cio an dirpi. Myanmar ram Federal ram in ser thannak ca ah tlangcung Party nih miphun aiawh in an i tel ve lawng ah kan thazaang a thawng lai an ti. KNU nih cun cathanh tiang in a chuah cang. (c) Ramchung ramleeng a um mi dihlak ti awk in mah le miphun Party cio an rak dirpi.

3. CNLD hrimhrim kan thazaang a thawng tuk. Hmailei kan miphun ca ah kan sui mansung a si mi University Siangakchia, Mino Bu kip ah hruaitu le cawlcangh mi Hakha khualipi chung in mino (600) leng le khuate in mino (500) leeng nih CNLD teinak ca ah an kan cawlcangh pi. Thantlang khuachung zong in mino 300 leeng Lautu le Zophei tlang in mino (400) tluk le a dang tlang in mino (500) tluk nih mah le tlang cio ah CNLD thimfung pek ding ah thazaang an chuah.

4. Chin Ramkulh chung in ram leeng a phan cang mi dihlak ti tluk in CNLD an kan dirkamh ca ah kan i lawm tuk. India le Malaysia ah a ummi siseh, ramthum nak a phan cang hi USA in, Europe in Asia Pacific ram in Australia le New Zealand ummi dihlak tluk in CNLD thapeknak, tanpi nak Social Media in, ramchung lei an chung le forhfialnak in an kan dirpi ca ah kan lung aa lawm.

5. CNLD nih kan i tinhmi cu Term khat Cozah tuan lawng a si lo. Vawleicung ahmunh chung kan Chin miphun, kan ram, kan nunphung le ka vawlei a himnak caah a dik mi Federal Democracy tling le Panglong hnatlaknak bantuk in mah te in uknak nawl le khuakhan lairelnak ngah hi a si. Kan ram uknak kanmah miphun kut chung ah a um lawng ah kan miphun a him lai i a dam lai ti hi CNLD tlaihtleng a si.

Cucaah kan dihlak in Chin ahcun Chin Party CNLD thim hna usih. Kachin ah Kachin thim ve hna sehlaw, Shan ah Shan Party le Rakhine ah Rakhine Party thim ve hna seh. Kawl ah NLD nih tei sehlaw.. mah le miphun cio aiawh in Parliament ah, Remdaih sernak 21st Century Panglong Conference ah kan saduhthah kan i ruahti lai. Khua kan khaangti lawng ah a dammi ramkomh Kawlram cu kan ser khawh lai. Ref: Chin National League for Democracy – Hakha-Thantlang