Thawngpang Update: Taiwan Ramri Rilipi Cu International Waterway A Si Tiah US Nih Cohlan. Tuluk ram le Taiwan Island karlak ah ramri simi rilipi cu International Waterway a si tiah Taiwan nih a chimmi cu US nih kan cohlan tiah June 14 ah khan cathanh an chuah ve. Nawl ngeih nak hman a duh tukmi Beijing nih ramhnih i fonhthan dingin nawlnak le halnak atuahmi cu langhngan bakin duhlonak langhternak zong a si tiah US nih a chim.

Communist he ramchung kahdohnak ah a rak sungh hnu in 1949 Kum ah khan Tuluk nih Taiwan cu pal loin a rak hrial hnuin Taiwan rilipi cu atu le atu ti awkin i hmuhthiamlonak a chuahnak hmun pakhat a hung si. A liamcia caan ah khan US raltuknak tilawng siseh Britain le Canada raltuknak tilawng hna nih cuka rilipi cu an pal ruangah Tuluk cozah cu a thin a hung ngaingai.

Cheukhat ramdang hna nih cun cuka rilipi cu vawlei cung ram dihlak ta a si tiah an chim tikah Taiwan ramri rilipi kongah biaceihnak nawl kan ngei tiah Tuluk ramdang pehtlaitu minister nih June 13 ah khan a rak chim.Taiwan ramri simi rilipi cu international waterway a si. Chim duhmi cu Taiwan ramri rilipi cu aho ram ta hmanh a si lo caah zalong tein kal khawh a si pinah vanlawng zong zuanter khawh a si. Cu pinah international law ning zongin zalonnak hmunhma a si tiah US ramdang pehtlaitu minister Ned Price nih June 14 ah a chim. Taiwan ramri simi rilipi cu Tuluk ramchung ah a ummi a si lo bantukin Taiwan cu laak than dingin Tuluk i timhtuahnak zong hi a ngol hlei bal lai lo tiah Taiwan Prime Minister Su Tseng-chang nih a chim.