Yinmarpin Peng Ah Ralzaam Umnak Riahbuk Cu SAC Ralkap Nih An Khangh! Sagaing ramṭhen Yinmarpin peng Bant Bway khua i ralzaam umnak riahbuk (thlam) pawl cu SAC ralkap nih July 20 le 21 ah an khanghpiak hna i buk 25 a kaang, tiah tualchung mi nih an chim. Bant Bway ahhin ralzaam riahbuk 50 leng a um i cu chung ah buk 25 cu khangh an si, tiah Bant Bway khuami pakhat nih a chim.

Khuachung um ahcun i thuhnawh peng a si i cucaah ramlak ah kan i ṭhial. Duhsah tein ramlak ah inn tete a hun tam chin lengmang. Cucu SAC ralkap nih an duh lo i rallam an sial pah ah an khangh. Atu ah cun khoika hmun um zong ah zaam peng a hau cang. Nihin zong SAC ral kap hna cu rallam an sial ṭhan i tualchung mi vialte kan zaam dih, tiah tualchung mi nih an chim.

Thawngdang Salingyi Ah Palek 4 Thah An Tong Sagaing ramțhen, Yinmapin pengkomh, Salingyi market pawng i lakphakti dawr ah nihin July 22 zingka ah lakphakti a ding lio mi palek 4 kahthah an tong tiah tualchung mi sin in theih a si. Nihin zing Sml 7:30 hrawng ah market hnu lei lakphak ti dawr ah lakphak a ding lio mi palek 4 cu mawtaw pakhat in a ra mi minung 7 nih meithal in an kah hna i an kir colh tiah mit hmutu tlual chung mi pakhat nih a chim.

Thah a tong mi palek 4 kong he pahtlai in Salingyi palek nih Salingyi ah duty a tuan lio mi palek thar 2 le camp i palek 2 cu zingka dawr an kal ah thah an tong, an phaknak zong a sau rih lo tiah an chim. An ruak cu Slingyi siizung ah an kal pi tiah theih a si. Salingyi palek zung ah nikum, 2022 October thla ah khan palek bawi pakhat tel in palek 3 cu mithi kong an hlathlai i an kir lei ah bomb an i pal i an thi.

Thawngdang Sagaing ramțhen, YeeOo peng ah SAC ralkap nih July 8 in July 14 tiang ni 6 chungah tualchung mi 10 cu mei in an khangh hna thah pin ah inn 125 an duah tiah tualchung mi hna le mizapi vengtu ralkap phu hna sin in theih asi. July 8 in July 14 ting YeeOo peng chung khuate hna ah SAC ralkap cu an lut i MiMaungKone khua in khuami pakhat, LingDaw khuami pahnih, KaanPauk khuami pathum SiiThar May khuami pahnih, KoPhyo khuami pahnih tiin an dihlak 10 an thah hna. SiiThar khua inn 23, KoPhyo khua inn 31, MiMaungKone khua inn 72 zong an duah tiah theih a si.July 8 ah Sagaing ramțhen YeeOo peng, Siithar khua cu SAC ralkap nih helicopter 4 in an kah i khuami hna khua chung ah an kharkhumh hna theih a si.

July 8 zinglei Sml 10 :00 hrawngah Sagaing ramțhen, YeeOo peng, Siithar khua cu SAC ralkap nih helicopter 4 in an kah i ralkap an țhumh hna. Chun Sml 12:00 hrawng tiang an kulh i an kah cah khuami hna cu zaam kho lo in an kharkhumh hna, phone line vialte an phih dih hnu ah SAC ralkap hi an rak lut, SiiTharMay khua ah PDF sakhan a um tiah thawngpang theih in an lut i khuami an thahnawn hna pin ah inn an duah. SiiTharMay ah PDF sakhan i hruaitu HluatDaw palai a um tiah SAC ralkap cu an rak lut. Khuami hna cu an tlaih hna i an thah hna ” tiah khuami pakhat nih a chim.