SAC Ralkap Nih Mindat Mipi Sin Ah Facang An zuarh Hna. Nizaan August 5 ah SAC ralkap nih Mindat Bawahtit sang, RC biakinn ah a ummi hna sinah facang tun 100 hrawng cu tun 1 ah 40,000 cio in an zuarh hna tiah khuami nih an chim. Nihin zong ah Sanpiah nichuah lei ah tun 100 hrawng cu zuar ṭhan an i tim rih tiah theih asi.

SAC ralkap hna nih cun Mindat-Pakhukku lei ah a kal mi minung cit mi motor le thilphor motor pawl cu a tlawmbik minung 7 nan tlin lo ah cun chawhlehnak nawl pek nan si lo, tiah nawl an chuah i Mindat-Pakhukku lei ah motor tlungkal an tlawm ngai, tiah CDF-Mindat nih cun cathanh an chuah.

Thawngdang Mon Ramkulh, Kyaikhtu Ah SAC Ralkap Nih PDF Chungtel 3 Inn An Hrenh! Mon ramkulh Kyaikhtupeng Thahtone pengkomh PDF ṭuanvo ngeitu Aye Min Htun inn telh in PDF ralkap inn 3 cu SAC ralkap nih an hrenhkanh hna tiah theih asi. A luancia August 4 ah Kyai khtu khua um, Aye Min Htun, San Lin le Win Ko hna cu SAC ralkap nih Ralhrang an si caah an inn cu rampi nih a ngeihmi inn a si cang an ti i, tawh an hrenhkanh hna.

SAC ralkap nih Aye Min Htun cu section 505(A), 50(J) pinah case dang 10 nak tlawm lo in taza an cuai hna i, Win Ko le San Lin zong 505(A) in taza an cuai hna tiah anmah he naihniam mi pakhat nih a chim. Palik bawi pakhat asimi Aye Min Htun cu SAC ralkap nih uknak an lak hlan ah Mon ramkulh Cheif Minister PSO rian a ṭuanmi asi tiah theih asi. Nawlngeihnak lak hnu in Kyaikhtu peng ah NLD party palai NLD party a dirputu hna le PDF chungtel inn 8 nak tlawm lo SAC ralkap nih an hrenhpiak cang hna tiah theih asi.

Thawngdang Khah MDY-PDF Sin Ah Mipi Nih Bawmhnak An Pekmi Phaisa Cu PDF Nih An Phawtzamh! MDY-PDF Sin Ah Mipi Nih Bawmh nak An Pekmi Phaisa Cu PDF Nih An Phawtzamh! Mipi nih hriamtlaitu hna sin i bawmhnak an pekmi phaisa cu hriamtlai phu hna sin ah kan phawtzamh khawh cang tiah Mandalay tualchung hriamtlai phu MDY-PDF nih nihin August 5 ah cathanh an chuah. MDY-PDF hna sin ah mipi nih bawmhnak pekmi phaisa cu thlafatin kan pek khawh hna nak hi thla hnih asi cang ralkap pakhat sin ah Ks 10,000 in kan pek hna tiah an langhter.

Ralkap dihlak sin ah phawtzamh a si caah a phaisa fang in cun a tlawm ko nain, mipi sin in a lutmi phaisa a si caah mizapi le PDF karlak doh thlennak ding i dawtnak aluangmi asi tiah MDY-PDF nih an langhter. Mipi lei zong nih nan pekchanhmi phaisa cu PDF kut cung i a phanh nan hmuh tik ah nan i lungsi cio ko lai. PDF lei zong nih kan hnu lei in mizapi nih an kan ṭanpi i, an kan dirpi ti kan theih caah kan lungthin a nuam tuk, ti in cathanh an chuah.

Chaung U Ah SAC Ralkap Zulhmi Motor Pakhat Cu PDF Nih Bomb An Puahhnawh I, Ralkap 2 An Thi: Sagaing ramṭhen, Chaung U in Nissan Note motor he a chuakmi SAC ralkap 8 cu nihin August 5, chun suimilam 12:30 hrawng ah Hlaittapiat Sun Ngyo pah-kah-phah phu nih cun bomb an puahhnawh hna caah SAC ralkap 2 an thi, tiah Hlaittapiat Sun Ngyo pah-kah-phah phu chungtel pakhat nih a chim.

Nihin August 5, chun suimilam 12:10 hrawngah Chaung U in Note motor ah acuangmi SAC ralkap 8 an um tiah thawng kan theih caah Natye kan khua le Gwaypintaw  khua kar ah bomb lung hnih kan puahhnawh hna i, SAC ralkap 2 an thi pakhat cu fak ngai in hliamhma a tuar tiah Hlaittapiat Sun Ngyo pah-kah-phah phu chungtel pakhat nih achim.