Mizoram Ah Myanmar Mi 2 Sin in Rithaisi An Tlaih Ṭhan! India-Myanmar ramri Mizoram ramkulh Champhai peng ah August 19 ah atu hi Myanmar mi 2 sin in rithaisi le bing 14 gram kan tlaih tiah Mizoram rithaisi khamtu phu nih an thanh. Mah thawngpang hi rak share cio ulaw an i ralrin cio nak ding caah aherh ngai mi asi.

Rithaisi he tlaih a tongmi Myanmar mi 2 hna cu Tedim peng Thinglei khuami Thang Sian Khai kum 26 le Zam Lam Sum kum 24 an si.  Tlaih a tongmi pa pahnih nih cun 125 Kenbo cycle in rithaisi cu an phorh i, lampi ah an tlaih hna tiah theih a si. August 18 zong ah khan Champhai ah bing 65.52 gram cu Mizoram mi pakhat sin in an tlaih, tiah theih a si. Tlaih a tongmi hna cu Upadi ning in an sualkawl a si.

Relchap Yangon ramṭhen Kyi Myin Daing Setsan sang um zupu dawr pakhat ah nizan August 19 zanlei sml 5:00 hrawng ah puahkehnak a chuak i, mino pa 6 an nunnak aliam tiah theih asi. Mino pawl cu pumpululh an chuih dih an ṭin lei ah zupu dawr ah an ṭhu pah. Cu lio ah bomb cu a puak i, pumpululh thuam he an ruak cu kan char hna. A thimi hna hi kum 18 a tling rih lomi an si tiah bomb puahnak sang ummi pakhat nih a chim.

Zupu dawr ngeitu pa cu a zaam i, a nu cu SAC ralkap nih an tlaih tiah theih asi. Kutser bomb puah sual nakin a thimi hna hi Pyusawhti an si lai, tiah a ruatmi an tam nain bomb puahnak sang ummi hna nih anmah sangmi an sinak kong cu an langhter. Cun an thih hnu ah ‘Pyusawh ti an si an ti hna caah an lungfahnak kong zong sangchung mi nih an langhter chih.

News Of Myanmar min in Telegram ah Yangon ramṭhen Kyi Myin Daing peng Setsan sang ah zanlei sml 5:00 hrawngah puahkehnak a chuak i, ralhrang 1 a thimi an hmuh. Ralkap nih puahkehnak hmun an va zoh tikah inn pawng ah ralhrang ruak 5 an hmuh chap. Dawr ngei tu pa zing a zaam tiah an ṭial. Cuti an ṭialmi cu thawng dik lo ngaingai a si. Puahkehnak ruang ah nunnak a liammi hna hi sualnak ngei lo kum tling lo mino an si tiah tualchung mi hna nih an chim.