Leitak le Hmawngtlang buainak aa thawknak

Kan Lai media cheukhat nih Leitak le Hmawngtlang an i velhnak lawng an tial caah a tu hi zapi theih in an buainak a hram aa thawknak ka vun tial lai. Hmawngtlang cu Leitak ram ah Leitak nih kan rak umter mi hna, kan fanau bantukin kan dawt mi hna an si. Keimah ka chuah hlan pi ah Leitak ram cuh le cheu ding an pu pa hna nih an rak i tim bal na’n an rak ngah lo. Keimah kaa theih hnu cun daw le rem tein kan um ti tawn ko.

Sihmanhsehlaw Leitak nih khuathar kan ser lai kan vun ti le cangka in umthiam loin a tu le tu cozah zungah ca an chiah. Mah khua tlak hlan zong ah Leitak nupa hna nih Hmawngtlang cu hi ka ah khua kan ser lai, Leitak ram thlum al te in kan hmang ti hna lai tiah ttha tein va chimh hmasa hna. Leitak khua thar kan sermi cu Pyine, Myona, cozah lei nih an rak kan lawmhpi I thazaang an kan pek hleiah cozah bawmhnak zong a si khawh chungin an kan pek rih.

Myone bawi pa nih Leitak le Hmawngtlang karlak ah tan-sa (report) a tam tuk, an ca leh-mah parukh a chah cang a ti. Myo-ne, Pyi-ne, le Kha-yaing bawi pawl nih deihnak a um khawhnak hnga Leitak le Hmawngtlang hi rem le daw tein rak um ulaw Myo zong kan in pek hna lai an rak ti hna. Nan khuah hnih hnatlaknak in Myo rak sawk uh an ti hna. Leitak upa pawl cu Hmawngtlang ah an va kal I Leitak ram kan hmang tti lai, kan i daw lai, nan report nak ca zong la tthan uhlaw kan khua hnih min in Myo zong kan sawk lai tiin an va sawm hna.

Cu ti Leitak upa pawl nih Hmawngtlang an va len lio hna ah Myone riantuantu leiin cazii Pa le khuakomh khuabawipa le kan Zophei ah kan pa bik Dr. Hmuh Thang nih an telpi hna. Hi I tonnak ah Dr.Hmuh Thang nih hmawngtlangpawl cu a nawl hna nan lung tthumh hramuh Zophei kan caah can tha bik kan hmuh mi a si Zophei myo kan hmuh kho ve cang lai hih tiah a forh hna nain an Hmawngtlang nih an duh hlei lo.

Cu tikah Thantlang Myone bawi nih an khua hnih in an auh hna i bia an hal hna. Leitak nih buai lengmang mi hi kan duhmi a si tung lo, Myo hmuh le daw rem te in um tti cu pei kan duh cu an ti. Sihmanhsehlaw Hmawngtlang tu nih cun “Myo hmuh kan duh lo, ram cheu long kan duh an ti hna myone lei nih ram kan in cheu kho hna lo, ram peknak nawl kan ngei lo, hmunkhat ah nan umti khawh nak hnga ding tu ah lam rak sial uh” an ti hna i an kir ter hna. Kan Laimi lakah kan pa a simi Dr. Hmuh Thang zong nih hi bantuk caantha hi rak tlolh hrimhrim lai ucih ti zongin thazaang a pek ve hna.

Cun nan theih cia bantukin leithuan caan a phan I Hmawngtlang khuami Hre Uk nih kum saupi a rak thuan ti lo mi, Leitak inn pawng a lei kha a ra i a rak thuan. Hi lei a thuan tiang ahcun Leitak nih zei an ti lo.Tlawmpal ah a lei a si lo mi Leitak nih volleyball benghnak caah an hmanmi, lei license a um lomi vawlei cu Hre Uk nih a vun thuan chih. Cu tikah Osuh khuabawi pa (Leitak le Hmawngtlang fonh khuabawi) nih hi hi cu license a ngei lomi a si, na thuang lai lo tiin ca voihnih tiang ca a pek.

Osuh khuabawipa a nawlpeknak ngai loin Hre Uk nih cu hmun cu a vun thuan chih tikah Leitak khuabawipa nih “ziah na thuan, license a ngei lomi a si hi”a tiin a vun ti tikah Hre Uk cu cu thlam ah a va kal I namtong a va lak I Leitak khuabawi pa cu kan thah lai tiin a vun zuan hnawh. Leitak khuami hna nih Hre Uk nih khuabawi pa namtong in a zuan hnawhmi cu an hmuh tikah an va tlik hnawh hna I Hre Uk a zam. Tlawmpal ah Leitak mino nih an va dawi i Hre Uk cu an tleih I Leitak upa hna sinah an ratpi.

Hre Uk Leitak nih an velh timi kha a hmanlo mi a si. An tlaih lio ah thinhun in voi khat hnih an bengh mi lawng a si. Tlawmpal ah Hre Uk a pa le a nu pi an rak phan ve. Leitak upa pawl nih Hre Uk cu license a ngei lomi lei rak thuang ti hlah an ti I tin ter. Tlawngpal ah Hmawngtlang minung 70 leng nih lei tilam kan rak tuah an ti I an rak ra. Leitak zong cu hmunkhat ah an I pumh ve I Hmawngtlang pawl cu tilam hi nanmah ta a si lo nan tuah lai lo an ti hna I an buai deng nain palek nih an kir ter than hna.

A thaizing ah Hmawngtlang cu an khuapi in lei tuah ding ahcun an rak I thawh than i fb live an i thlah mi ah khuaza um hmawngtlang rak kan zoh uh law kan ramri caah minun 150 kan i thawh i Aa Hre pa lei kan tuah pi an ti mi Leitak tlangval cheukhat nih an hmuh hna. Leitak mino 17 nih Hre Uk lei tilam phelh dingin an va kal. Cu cu Hmawngtlang Lei a thuangmi minung 50 hrawng nih Leitak pawl cu an va kal hnawh hna. Leitak pawl nih bia ruah ding an ti len ko hna na’n Hmawngtlang nih an iken mi thing in an tuk an velh hna.

Leitak pawl zong nih ti awk ttha lo in mah pum khamh nak ah cu mino 17 nih cun Hmawngtlang minung 50 cu an dir hnawh ve hna nak a si. Anmah pum khamnak caah.Palek phan hna hlah seh law Leitak hi hma a pu mi kan tam tak lai tiah velhnak ah a um ve mi nih a ti.vLeitak hi hmaa a pumi hi minung 7 an si. An hliamhma tuar a fah caah Thantlang siizung lei a rannak in an kalpi an timh hna. Lam ah Hmawngtlang nih an bawh hna I nan kal kho lo an ti hna caah zawkzawk tein Thantlang siizung zong an phanpi kho hna lo. Hmawngtlang hi 5 nih hma an pu ve.

Hmawngtlang nih media kip ah Leitak nih hriamnam ve an kan velh, kan thi an kan chuah tiah an rak tar hmasa tikah mi tampi nih zumh a rak si. A ngai ngai ti ahcun Hmawngtlang tu nih Leitak an va velhmi hna a si. A zei a va si ah lairam ah khua aa naibik le ram khat te a ei tti a ding tti mi mah ti kan si hi cu ngei a chia ko. Miphun hoi hna kan kar ah dawtnak a leng kho nak ding ah thlacam tu in kan bawm cio hram uh. Minung lawng in I tlangtlak ah cun a tlamtling kho lai lo. Jesuh long kan sawm piak cio hram uh kan mah thatnak kan chim cio ah cun kan chim kho cio ko lai nain deihnak tu kan chimh kho nak lai thlacam bawm kan herh.

Leitak thingram nih a cawm tti mi khua kan i daw i kan i rem lo ahcun kan vawlei thingram a ngeih kan chiater sual lai caah kan khua hnih in deihnak le remnak tu kan kawlpi cio hram uh. Mino pawl zong kan thinlinh buin biachia kha kan tial nak hnga lo kan sawm duh hna. Leitak le hmawngtlang a tteng thai kho ding ka si lo lungsau tein nan rel mi cung ah kaa lawm. By Thang Bawi Ling

Biakilh: Mah hi kong hi a ngeitu Thang Bawi Ling fialnak le tlungtlin tein rak thlahmi a si. Cun, a chung cabia zong remh le zuhmi zong um lo, amah ttial ning tein rak thlah mi a si.