Salai Lungthli Tum: US Nih Taiwan Le China Aforh Hna Thinphang Ngai Asi. Nutar nu Pelosi zong hi a raltha ngai ve China tlerhnak cu zei a rel bak lo tu bak kha Taiwan a phan ko cang. Mah vial hi thawngpang cu asi i adang theih mi tete aum cun thanh khawh than kan i zuam lai atangleiah thawngdang relchih khawh asi.

Thawngdang Paletwa Ah Sianggakchia Thlahtu Tilawng Cu SAC Ralkap Nih An Kah I Siangngakchia 2 Nunnak A Liam! Chin ramkulh leiin Paletwa ah siangngakchia a thlah/dongtu tilawng pakhat cu SAC ralkap nih an kah caah siangngakchia 2 nunnak liam i, midang 3 hrawng hliamhma an pu, tiah khuami nih an chim.

Cu tilawng cu Paletwa peng Yimawah khua in Tungmawah khua sianginn ah nitin siangngakchia a thlah/dongtu tilawng a si i, nihin chun cu a kir lei ah Hnamada khua tilawng dinhnak hmun ah umhmun khuarmi SAC ralkap nih an kah, tiah mit hmutu khuami nih an chim.

Cu tilawng chung ah cun siangngakchia 10 hrawng an cuang i, SAC ralkap kahnak in ngakchia 2 cu an nunnak a liam tiah theih a si. SAC ralkap nih tilawng an kah hnu ah, cu tilawng cu tiva kam ah dirter in tilawng khaltu le sianginn rianṭuantu hna cu an tlaih hna i tilawng chung ah a ummi ngakchia zong bia an hal hna, tiah min langhter duh lo mi pakhat nih media ah a chim. Credit: The Chin Post

Thawngpang dang: Kachin Ramkulh, Waimaw Peng SAC Ralkap Sakhan Pakhat Cu KIA Nih An Lak!: Kachin ramkulh, Waimaw peng Inwamyan SAC ralkap sakhan pakhat cu kan kah i, kan khanghtak, tiah KIA nih an thanh. Nihin August 2, zinglei ah SAC ralkap kuttang um pyi-tuh-sit le SAC ralkap phufonh an umnak sakhan cu KIA nih an kah hna, tiah tualchung media nih an langhter.

KIA brigade 5, battalion 3 hmunram Inwamyan khua pawng i SAC ralkap sakhan cu KIA nih kan kah i sakhan zong kan lak leng ah an hriamthil cheukhat zong kan lakpiak hna. Cu sakhan cu kan khangh i kan hrawh dih, tiah KIA lei nih an thanh ve. Kahdohnak ah hliamhma tuarmi le nunnak a liam mi an um le um lo cu theih a si lo. Chunhnu ah Waimaw um SAC ralkap khah-lah-yiah 58 nih minung thazaang 50 hrawng an chap ṭhan caah kaphnih kar kahdohnak a chuak kho ṭhan, tiah KIA lei nih an thanh.

Monywa Laṭi Sang Um Mi Mytel Zung Cu PDF Nih An Luhhnawh i Wifi Seh Pawl An Khangh!: Sagaing ramṭhen Monywa khua Laṭi sang ah SAC Ralkap nih a thli in an on mi Mytel zung cu nihin August ni 2 zaanlei suimilam 2 hrawng ah tualchung hriamtlai phu nih luhhnawh in an hrawhpiak hna, tiah Monywa People Defense Fotce (MPDF) sin in kan theih.

Mytel wifi seh 100 leng, Routers seh 4, line Cutter seh 4, laptop 4 le rian he aa pehtlaimi cauk pawl hna cu an lak i seh thilri pawl hna zong mei in kan khangh tiah MPDF nih an langhter. Mytel zung hrawhnak ah hin Monywa People Defense Force (MPDF) Monywa pengkomh Battalion 1, Monywa tualchung ralvengtu phu hna an i fonh tiah theih a si.