Thawngpang Thar: Dawei Ah SAC Ralkap Nih Nu 8 An Tlaih Hna

Myanmar News

Thawngpang Thar: Dawei Ah SAC Ralkap Nih Nu 8 An Tlaih Hna. Tanintharyi ramțhen, Dawei khuapi chung ah SAC ralkap nih Nu 8 cu an inn ah an luhhnawh hna i an tlaih hna tiah khuami hna sin in theih asi. July 15 le 19 ah Dawei peng, WaiKyun veng ah a ummi Nu 3 le Kyats Sa Pin, DaungNgu, BomMaw veng, hna ah Nu 5, an zapi 8 cu SAC ralkap nih an tlaih hna. Cu tlaih a tongmi Nu cheukhat cu SAC ralkap nih nawlngeihnak a lak hnu ah sianginn pehzulh in an kai lo i an mah an inn te ah a um mi Sianghleirun siang ngakchia hna an i tel tiah chungkhar hna he a neihniam mi hna sin in theih a si.

Dawei khuami pakhat nih tlaih a tongmi hna hi Nu lawngte an si. An nih hi ram khellei ah zeihmanh a tuahmi an si lo. A tu bantuk in zei hmanh theih lo in an tlaihmi zong hi an um len kho rih tiah a chim. Dawei khuapi chungah tu kar hrawng cu CDM siangcachim hna cu tlaih ding in SAC ralkap ralbawi pakhat nih nawl a chuah i cu hnu ah tu bantuk in tlaikhih a tam chin tiah theih asi.

Relchap ding thawngdang KNU Brigade 5 hmunhma chung ah ralhranh in umhmun a khuarmi SAC ralkap chungin ralkap 2 cu hriamnam he CDM an tuah tiah KNU Moetraw nih thanh. SAC ralkap pakhat cu Regional command headquarters Loikaw kuttang Khah- Lah- Yah – 54 battalion in a si i hriam nam 2 he July 10 ah KNU sin in CDM a tuah tiah an langhter. A dang SAC ralkap pakhat cu Phapon hmunhma um Khah- Mah- Yah – 341 battalion in a si i Karen ramkulh in Karenni ramri um NatTaung SAC ralkap sakhan ah a um mi a si i July 6 ah hriamnam he a rak zam i KNU sin ah CDM a tuah tiah theih asi.

Thawngdang General Nedar Bo Mya Hruai Mi Ralkap Le Venom Commando An I Bawm Cang Lai. General Nedar Bo Mya Hruai Mi Ralkap Phu Dirh A Si I Venom Commando He An I Bawm Lai: General Nedar Mya hruaimi ralkap phu KAWTHOOLEI ARMY Karen People’s Army tang um cu dirh a si i Venom commando hna he i bawm in SAC kan doh lai, tiah Saw Win Myint hruaimi Venom Commando nih nihin July 19 ah an thanh.

Longtime Myanmar rebel leader dead at 79, guerrilla group says | Taiwan News | 2006-12-25 00:00:00

KAWTHOOLEI ARMY cu General Nedar Mya hruainak in July 17 ahkhan dirh asi. Venom Commando hna he Karen People’s Army tang ah ṭangrual in SAC ralkap hna cu faak ngai in kan doh cang hna lai. Cucaah Karen mizapi nih a kan cohlang ding in thawng kan in thanh hna tiah an thanh.

Tanintharyi Ramṭhen Ah SAC Ralkap Hriam In Tualchung Mi Pakhat Nunnak A Liam! Tanintharyi ramṭhen Palaw peng Ping Ne Taung khua ah SAC ralkap kahmi hriamngan kuan a tlak caah mino pakhat cu a nunnak a liam tiah tualchung mi nih an chim. July 19, zinglei suimilam 1:30 ahkhan Palaw no.285 battalion ummi SAC ralkap nih hriamngan in Ping Ne Taung khua lei cu an kah, tiah theih asi.

Mit hmutu pakhat nih cun SAC ralkap hriamngan kahmi cu khuachung i atlak caah tualchung mi pakhat nunnak a liam i, pakhat zong hliam hma pu, a hliamhma cu a fah ngai caah sizung ah an kalpi tiah achim. Hriamngan hliamhnak ruangah nunnak a liammi cu Ko Zin Wai kum 20 a si, tiah tualchung mi nih cun an chim. Palaw peng ah tualchung hriamtlai phu hna le SAC ralkap hna cu atu le tu an i kap i, a luan cia July 13 ahkhan SAC ralkap le tualchung hriamtlai phu kar kahdohnak ah tualchung hriamtlai phu lei in ralkap 3 an nunnak a rak liam.

Leave a Reply