Khah! atunai ah Zing Tin Cuai timi Facebook pakhat nih Sangtei nufa hna bawmhnak an pekmi kongah le a halpiaktu David Nun Tho nih a kuat hna lo amah nih a ei timi kong amah pumpak facebook cahmaiah a tial. Hikong a ttialmi ahman lomi (Fake) thawngpang dik lo a si. Zalen news zong nih naite ah Sangtei nufa hna bawmhnak an tuahmi hna cu Kawlram leiah kuat a si cang nak kong fiang tein a rak langhter bal cang. David Nun Tho nih bawmhnak ahalmi eihmuarnak zeihmanh a ngei lo i a tuah fawn lo.

Bawmhnak tuah halpiaktu hna David Nun Tho hi midang bantukin harsa ngaiin khuasami an si lo. Pathian nih thluachuahnak a pek hna i khuasak tuntuknak ah harsa ngaimi an si lo. Laimi Level in cun mirum pakhat dirhmun a dir khomi a si ve. Amah hi mi sawhsawh a si lo. Chinmi Sponsor laknak kongah kanmah a kan buaipitu pakhat a si ti kha nan theihnak lai ka vun chim duh.

David Nun Tho konglam cu kan i bochanmi kan pale Dr. Hre Kio le Rev. Hoi Cung Tum hna khi fiang tein hal khawh an si. Anmah nih a konglam an theih ngaingai. David Nun Tho hi Chin Community Leader, Enterpreneurship ngeitu zong a si i pawcawmnak lei zongah Car Dealership Mawttaw cawkin le Zuarin paw a cawm khomi a si. David Nun Tho hi Pathian a bochanmi le ttihmi a si i Chinmi nih kan i bochan ngaimi pakhat a si.

A rianttuannak pawl hi Chin Community Of Indiana ahhin Board Member ttuan liomi a si. Cun Chin Pawlpi USA  ah (GS) ttuan liomi a si. Indiana Chin Community ah President ttuan liomi a si fawn i a lar ngaimi Chin TV ah Executive Producer ttuan liomi a si. Zeica dah a rianttuannak le amah Personal Business tiang hi ka langhter ti ahcun Chinmi nih bochan taktakmi pakhat a si hleiah Mi bawmhchantu ttha taktak a si i atu bantukin amah pumpak thangchiattu an um ruangah asining kan theih khawh tawkin kan rak ttialmi a si.

Sangtei nufa hna caah bawmhnak an halmi cu a pek hmanh an pek cang hna tiah theih a si fawn. Kalaymyo Chin Pawlpi (Chin Community) hruaitu President, Secretary le Treasure hna nih Sangtei te nufa an khuakehnak amah hrimhrim va kalin bawmhnak an kawlmi tangka cu an pek cang hna tiah David Nun Tho sinin fiang tein kan theih. Adonghnak bikmi chim ka duhmi cu David Nun Tho nih hin Sangtei nufa caah tiin bawmhnak a halpiakmi hna hi a ei hrimhrim lo. Tlamtling tein an pek cang hna. A dihlak in ahmuhmi hi Zalen News nih alanghterning ahcun US Dollar 8185 bak an hmuh i Kawlram Kyat 12,081912 hrawng a si i Sangtei chungkhar sinah kan chim cia bangkhan Kalaymyo Chin Pawlpi (Chin Community) hruaitu President, Secretary le Treasure hna nih  tlamtling an chuahkehnak ah an pek cang hna. Atanglei Kawlram lei i an kuat hnanak tehte kan rak chiah chih i rel khawh tthan khawh a si.

Nikum 2019 ah caan saupi mipi buaipimi le caiphai a hlawh taktakmi Sangtei nufa an rak tlaunak kong a thar in kan vun langhter tthan. Sangtei nufa cu an chuah kehnak khua Falam peng Farso an um cang nain an caah tiin Gofundme in bawmhnak an rak halpiakmi hna cu a tutiang an kut cungah a phak rih lo lawng si loin kuat an si lo i tukum ceuh ah kuat an si. Sangtei nufa hna caah tiin bawmhnak a tuahpiaktu hi David Nun Tho a si i amah nih Gofundme in bawmhnak a halpiak hna. US Dollar in 8185 an hmuh khawh i Kawlram tangka in cun Kyat 12,081912 a si i Sangte i chungkhar a simi Mah Ting Kalaymyo ah a ummi sinah kuat a si cang.

Mah Ting nih cun ” Phaisa bawmhnak an hmuhmi cu Kalay Chin Community hruaitu hna he caih ttinak kan ngei lai i nirukni silole hmaizarh nirukni ah kal kan i tim. Phaisa hmannak konghe pehtlaiin cun amah Sangte a chungkhar hna he chim caih ttinak kan ngei lai. A hramthawk ahcun Sangte zong Kalaymyo ah ra dingin kan ti nain Mawtaw a rit tuk ruangah a rat khawh lai lonak thawng kan theih i kanmahtu an khua ah kan kal lai” tiah a chim. Sangte cu a pasal (kawlpa) nih zeihmanh chim loin a kal taak i thlakhat fai umnak hmanh ngei loin Yangon ah an rak vaivai. A konglam cu Shwe Kyar Community nih an rak phozar i Falam Mino phu Yangon ummi hna teimaknak thawngin hmuh le him tein a chuahkehnak khua an tlung khawh le an phak khawh hi a si. Credit: Zalen

Note: Zing Tin Cuai (Thlumpi) nih attialmi thawngpang kha thawngpang deu a si tiah thawng kan rak in thanh hna. Atu kan rak ttialmi hi mipi sinah fianternak kan rak tuahmi a si. Cucaah Copy in Website dangah nan kan tuahpiaknak lai lo kan in nawlpat hna i kanmah Website in Share duhmi nih nan rak share nak lai kan i sawm hna i kan in theih duh fawn hna.