Admin||04 Vaupi 25-2020||Indianapolis khua ah Covid-19 zawtnak a ngeimi Chin miphun 300 leng an um cang tiin hi thawngpangca nih a tial. Hi cazin hi zeitlukin a hmang lai ti cu ka thei kho lo . Zeitin data an lak le research an tuah ti zong an chirchanmi pa nih a langhter lo caah a hmang bak ko tiin pom ka harh pah. Nain an tam ngai ti hi cu ka theih ve. 

Cun Michigan le Iowa State um Chin miphun zong a den taktak ve hna ti a si. Abikin Iowa hi a zual deuh ngai tiin ka hmuh. Tuzarh chungah Covid-19 in a zaw liomi nupa he kan i chawn kho, cun a dang innchungkhar pakhat he zong kan i chon. Zeitindah mah zawtnak hi nan ngah tiin nan zum tiin bia ka hal tikah ” Kan innpa nu nih a dam lo le sii nan ngei maw tiin inn ah a kan leng le a mah nih a kan chawnh theu lai dah, a nih Covid-19 zawtnak ruangah atu hi siizung ah a thlop lio a si,cu caah a mah sin in a rami a si kho bik tiin kan zumh” an ti.

A dang innchungkhar tu hi cu an riantuannak Tyson in mah zawtnak chawnhmi an si tiin an i ruah.Cheukhat an i chawnh ning cu hrial khawh a si lo. Nain cheukhat an i chawnh ning hi hrial khawh a rak simi zong a rak si kho men ko.

Zeiti a si zongah a si cangmi cu a si cang ko- ti awk a tha ti lo. Chin miphun chungah hi zawtnak hi a zor lei lam ah kan kal le kal rih lo a fian lo caah i ralring thiam rih ko hna uhsih. Kutthawl, a herh tuk lo ahcun a leng chuah lo ding le pakhat le pakhat i leng kai rih lo ding timi zul rih ko hna uhsih. Daithlang hna hlah uhsih! Credit: Salai Z T Lian. Kawlca tling tein rel na duh ahcun LINK timi rak hmet heh piak law rel khawh a si lai.

Indianapolis khua le Fort Wayne khua kar lak a um mi Logansport khua hme te ah Tyson company vok thahnak ah a ttuan mi cu tuzarh ah Coronavirus an test hna i minung 200 tluk sin ah positive an hmuh hna. A ttuan mi thong 1 leng an si i an dihlak in test an timh hna.

Hi vok thahnak hi Myanmar mi tam tak tak an tuanbak hmun si i 2009 hrawng ah khan Laimi zong rian ka rak chia bal hna. 2007 ah Operasi an rak lut i Mexican pawl tor an tlaih hna caah company ngeitu pawl Fort Wayne khua ah a rak ra i Biakinn bak ah rian sok nak an rak tuah bal. Indianapolis in Laimi zong a lang in a ttuan mi an um pah rih ko tiah an ti. Credit: Salai Cung Kenglawt