Thawngpang Chia: Ngeihchia Tuk Ee! SAC Ralkap An Rak Phak Ruangah Matupi peng, Zotung khuate 11 in mipi 2,500 hrawng an zaam. Hi SAC ralkap an rak phak ruangah Matupi peng, Zotung khuate 11 in mipi 2,500 hrawng an zaam. Chin ramkulh Matupi peng Zotung lei ah hi SAC ralkap pawl an phak caah khuami 2,500 hrawng an zaam tiah theih a si. August 6 ah Zotung peng Nawbung khuate ah SAC ralkap 80 hrawng an luh caah a pawngkam khua 11 in khuami 2,500 hrawng himnak hmun ah an zaam tiah CDF-Zotung nih a thanh.

SAC ralkap pawl cu Gangaw in Matupi lei ah a ra mi an si i August 6 ah kahdohnak um lo buin hriamngan/hme an kah i Nawbung khua ah an rak luh hi a si. Ruah a sur lengmang ruangah ralzaam hna nih ihnak ruahkhamnak eidin le sii-ai an herh ko tiah CDF-Zotung thawng thanhnak in theih a si.

Thawngdang Aizawl Ah A Voihnihnak Myanmar Ralzaam Bawmh Halnak Ah Ks. Sing 38 Leng An Hmuh. Aizawl Ah A Voihnihnak Myanmar Ralzaam Bawmh Halnak Ah Ks. Sing 38 Leng An Hmuh Kalay peng ralzaam hna bawmhnak ah India ram, Mizoram ramkulh khualipi Aizawl ah zatlang bu hna i bawm in August 6 ah bawmhhalnak an tuah i, Rupees 152,079(kyats sing 38 leng) an hmuh tiah theih asi.

Cu bawmhhalnak ah cun MZP, MZI, MDM, PUMP, NUFDM, Mizo Student’s Union, Lemcang thiam phu le ramkhel ah a cawlcang mi phu hna nih bawmhhalnak an tuah. A luancia July 30 lio ah a voikhatnak bawmhhalnak an tuah i, Kyats sing 23 an rak hmuh. A ra laimi August 15 ah Kalay peng ralzaam hna ca ah a voithumnak bawmhhalnak an tuah ṭhan lai tiah theih asi.

Thawngdang Magway Ramṭhen, Myine Peng Kahdohnak Ah SAC Ralkap 38 An Thi I, PDF 3 Nunnak A Liam. Magway ramṭhen Myine peng Dwinma khua pyusawhti sakhan cu PDF phufonh nih an kah caah SAC ralkap 38 an thi i, PDF in ralkap 3 nunnak aliam tiah My==ine lei tual chung hriamtlai phu nih cathanh an chuah.

August 6, zinglei suimilam 5:25 ah SAC ralkap phu hna cu Myine peng tualchung hriamtlai phu battalion 1 hruainak in Pakokko peng hriam tlai phu PPDF, Mupian hriamtlai phu Pung Taung Ngyi Nawng phu Magway PDF, West Ayeyar Guerilla Force le Zarman pah-kah-phah phu fonh hna nih an kahdoh hna tiah theih asi. Kahdohnak ah SAC ralkap 34 cu an thi colh. SAC ralkap lei bawmtu ding in cycle 7 he a kalmi SAC ralkap hna cu lampi ah bomb puahhnawh an ton ṭhan caah cycle 3 cu i hlonh in an tlau adang cycle 4 cu an zaam hna tiah theih asi.

Dwinma khua SAC ralkap sakhan cu lak ding in timhtuah a si nain, SAC ralkap lei bawmtu an ra i, vanlei kahdohnak an tuah caah tualchung hriamtlai phu lei hnu an tolh ṭhan. Kahdohnak ah tualchung hriamtlai phu lei in ralkap 3 nunnak a liam i, midang 5 nih hliamhma an tuar an hliamhma kong ah thinphan ding a um lo, tiah theih a si. Cu kahdohnak ah cun SAC ralkap lei in pyusawhṭi hruaitu Pakokko khah-lah-yiah 259 chungtel ralkap 5 telh in SAC ralkap 38 an thi i, hliamhma tuarmi 27 cu Pakkoko siizung ah an chiah hna tiah theih asi.

Tualchung ralkap le SAC ralkap hna cu zinglei suimilam 5:27 in zinglei suimilam 6:41 tiang an i kap. Myine tualchung hriamtlai phu nih cun Kahdohnak chung ah kan dihmi hi Kyats sing 800 man hrawng asi mipi bawmhnak thawng in kahdohnak kan tuah khawh caah mizapi nih kan bawm cio hram ko uh tiah cathanh an chuah. Cun Sagaing ramṭhen Butalin peng Butalin-Monywa motor lampi ah nizan August 7, zing lei suimilam 5:00 ah SAC ralkap le Kanawng hriamtlai phu kar ah hmun hnih in kahdohnak a chuak i kahdohnak ah SAC ralkap 5 an thi, tiah Kanawng tualchung hriamtlai phu in ṭuanvo ngeitu nih a chim.

Demoso Peng Sanpiah Khua Ah Bomb I Lamhnak In SAC Ralkap 4 An Thi: Karenni ramkulh, Demoso peng Sanpiah khua pawng ah um hmun a khuarmi SAC ralkap hna cu August 5 i rallam an sialnak ah bomb lamhsualnak in ralkap 4 an thi, tiah KPDF nih cathanh an chuah. Bomb i lamhsualnak in a thimi SAC ralkap ruak a chartu hna cu tualchung hriamtlai phu nih 60 mm in an kah ṭhan hna caah SAC ralkap hliamhma tuar mi an tam tiah kPDF nih an thanh. Sanpiah khua Khrihfa Biakinn chung i umhmun a khuarmi SAC ralkap hna cu KPDF le tualchung hriamtlai phufonh nih an kah hna caah kaphnih kar kahdohnak minutes 30 hrawng a chuak, tiah KPDF nih August 6 ah an thanh.