Kan hnu December thla ah China ram Wuhan in ai thokmi pulrai nih a tu hi a voihnihnak China ram cu a den cuahmah tthan cang hna. Kan hnu deuh ah khan cun hi pulrai zawtnak in kan luat cang tiah an rak thanh i mipi zong duhpaoh in an rak chuahter hna nain a tu ah cun a thokmathar in ramhung ah zawtnak a karh cuahmah tthan cang. China nichuah chaklei kam ah a ummi Harbin khuapi hna cu biatakte in a den tthan cang hna. Hmunkhat ah mipi tthutdir zong an kham tthan cang i luhchuah zong an kham tthan cang tiah nawlngeitu hna nih an chim.

Heilongjiang Province khuapi Harbin ah hin minung 10 million hrawng an um lai tiah ruah a si. Hi khuapi chung ah a lenglei minung a ho hmanh luhchuah sianh an si ti lo tiah a hmun ummi nawlngeitu nih an chim. Khuachungmi lengchuah duh tik zong ah himnak ding caah QR code timi an phone ah chiah piak viar an si. Cu an phone ah cun COVID-19 a ngeiloh timi langhternak a hringmi chiahpiak an si. Cun leng an chuah tik ah hmaihnuhnak hman hrimhrim a si fawn ding tiah nawlngeitu hna nih an thanh.

China nichuah chaklei ramtthen ah a ummi Heilongijing, Russia ramri ah a ummi hi coronavirus a tambiknak hmun a pahnihnak a si ti a si. Hi khuachung ah hin kan hnu ni 10 chung lawng ah khan coronavirus a ngeimi minung 57 hmuhchuah an si tthan cang ti a si. Tu thla thokka ah khan China nih hin Russia he i pehtlaihnak ramri vialte hna cu an rak khaar chung. Cu bantuk tthiamtthiam in Harbin le Suifenhe khuapi ramri vialte hna in siseh Intiernationals in a rak phanmi vialte hna zong zarhli chung a dangte ah chia in hneksaknak tuah an si tiah an chim.

A sinain Harbin nih hin a tu tiang hrimhrim in Russia vanzuanglawng hna cu an luhter ko hna tiah cacawn nithumni ah khan an chim. Hi khuapi chung ah hin hi zawtnak a ngeimi minung 75 an tling tthan cang. Cu lawng silo in minung 1,400 hrawng cu zohkhenhnak tang ah an um cuahmah lio a si tiah khuapi nawlngeitu hna nih an chim. Cun cacawn nithumni tthiamtthiam ah khan National Health Commission nih Mainland China ah hin coronavirus a ngei tharmi minung 72 bak an i chap tthan tiah an chim. NHC hna nih an chim rihmi cu a tu tiang ah zawtnak a ngeimi hi minung 82,788 an tling canh hi hi zawtnak a thihpi cangmi hna hi minung 4,632 an tling cang ti a si. Ref: KYODO NEWS