Thawngpang Ṭha Taktak: Halkha Covid-19 Mizaw He Motor An Cit Ṭimi Falam Pa Negative A Si Tiah Theih A Si

Chin News

Hakha Covid-19 positive a simi Case-150 he Kalay le Falam tiang motor ai cit ṭimi pa pakhat cu a thisen an check an tikah Negative a si tiah Falam senpi sizung rianṭuantu sinin thawngpang kan theih. Falam i Facility Quarantine an chiahmi hna minung (2) cu an thisen an check tik hna i Covid-19 hrik an hmu rih lo tiah theih a si.

Case-150 thawn motor to tlang Falam pa Negative an ti

Hi zawtnak an checkmi hna hi Mizoram in a rak tlungmi pakhat le Halkha Case-150 he motor an cit ṭimi pa an si hna tiah theih a si fawn. Falam Senpi zung lutlai sibawi Dr. Tluang Cung Thang nih a chimmi cu “Mizoram in a tlungmi kan checknak a ruang cu ramdangin a rakmi a si ruangah a si. Case-150 he motor an cit ṭimi pa lawng hi kan check lai i positive a si lo ahcun a chungkhar zong kan check hna lai lo. A voihnihnak cu kan check ti lai lo. Zeiruangah dah ti ah cun positive a ngeimi he an i tonnak kha ni (21) a rauh cang ruangah kan check ṭhan ti lai lo,” tiah a chim.

Case-150 he motor ai cit ṭimi Falam pa i a chugkhar hna cu Home Quarantine in an chiah hna tiah theih a si. Cun thawngpang ṭha taktak a um ṭhanmi rihmi cu, Case-150 ruangah lunghrinhmi hna Halkha sizungah Quarantine in an chiahmi hna minung (56) hna cu tuzing ah an Negative an si tiah Hakha General Hospital nih thanhnak an tuah ve. Cirhti

Leave a Reply