Ramkulh le ramṭhen (9) chung i naupawimi hna cu Covid-19 harsatnak ruangah bawmhnak 30,000 cio pek an si lai tiah Zatlang bawmhnak petu zung nih thanhnak an tuah tiah ka theih.

Hi bawmhnak hi naupawi le ngakchia (2) tang bawmhnak thla fatin an pek tawnnak hmun ah cun pek a si ti lai lo. Atu i hi bawmhnak an peknak ramkulh le ramṭhen pawl hna cu, Naypyitaw, Kachin, Magwe, Sagaing (naga tel loin), Mandaly, Yangon, Mon le Taninthari ramṭhen pawl ah pek an si lai.

Hi kong bawmhnak he pehtlai in bawmhnak hmuh a duhmi Hniang (15) in Zing (20) tiang min pek ding a si lai. Min peknak ding cu Ngwebike timi application kha Play store (Play store cu mobile phone a um i thil download phunkhat a si) ah download na tuah lai i cu ka ah cun min pek khawh a si lai. Cu ti a si lo ahcun, naupawimi hna nih Peng zung le Disctrict zung ah min pek khawh a si lai.

Bawmhnak phaisa hi Zing ni (20) hnuah pek an si lai. An peknak ding cu Irawady Bank, KBZ Bank, Wave Money in pek an si lai tiah Zatlang bamwhnak petu zung i Director rianṭuantu Kyaw Lin Htin nih a chim. Charhchan: Zalen

Note: Nithla tibantuk pawl cu kanmah Laini thlarelning tein kan rak ṭial caah a theithiam lomi tampi nan um kho men. Hniang-August tinak, Zing-November thla tinak  a si.