Thawngling Mualhlun: Teamwork Thiam Kan Herh, Ulenau Hna

Sermon

Sermontawi: TEAMWORK THIAM KAN HERH Ulenau hna, Mikip hi Pathian nih pahrang a kan pek cio. A kan pekmi cu aa dang cio i sang ngai le ṭhahnem ngai in a hmang kho zong kan um lai, a hmang kho lo deuh zong kan um lai. Sihmanhsehlaw pahrang a ngei dihmi minung hna nih hmunkhat riantuan kan hon thok cangka in pahrang ngeih cio mi lawng kha a za ti lo. A bu tein, hmunkhat te ah pahrang fonh cio in ṭuanṭi thiam tu kha a hong biapi deuh cang.

Cucu mirang nih teamwork an ti i kan holh in cun hmunkhat rianṭuanṭi thiamnak kan ti ko lai. Teamwork ahcun pumpak thiamnak kha a zor a herh caan a um, hleice in retheih lak caan zong a um, hleice in hlorh deuh a herh caan zong a um fawn. Zeibantuk dirhmun in kan i tel zong ah kanmah pumpak thangṭhat kawlnak ah siti lo in kan aiawhmi buu ṭahnchonak le ṭhatnak tu ah a si lai.

Cucaah team work thiam cu mikip nih kan cawn a herhnak a si. Kan nule pawchung in kan hon chuahpi mi a si lo, cawn chom in thiam chin lengmang dingmi tu a si. Kan thiam dih ti zong a um fawn lo. Cawn pah in ttuan, ttuan pah in cawn pah i thiam chin lengmang mi tu a si. VAWLEI CUNG AH TEAMWORK A THIAMLOBIK MI CU DICTATOR PAWL LE DICTATOR LUNGPUT A NGEIMI AN SI. Annih cu anmah duhning lawng kalpi an duh i a tlamtlinnak hnga thahrum an hman zungzal. An duhnak a tlinnak hnga hramhram in mihnek an hmang. Mithah zong an ngamh. Cucu vawleicung ah an khat. Nangmah le keimah zong iralrin lo ahcun cu bantuk lungput ngeih khawh ngai a si ve. Cucaah teamwork kan cawn ve hrimhrim a herhnak a si.

Hellen Keller, A mit a caw i a hna a chet nain vawlei minthang ah aa chuahmi nih cun, …Teamwork thiamnak nih chunmang a tlinter. Rianphawt a kan thiam ter I teinak le tlamtlinnak a karh ter. Mahlawng in cun tlawmte lawng kan tlamtlinh, hmunkhat riantuanthiamnak (teamwork) nih cun tampi a tlamtlin ter, a ti.

TEAMWORK A THAWKTU HI PATHIAN A SI. Minung a kan sernak ah a rak hman cang. “Cun Pathian nih cun, atu cu minung kan ser cang hna lai; kanmah mui an keng lai i kanmah he kan i lo lai” (Gen 1:26a). Teamwork ah aa dawh ngaingai mi biafang cu ‘KAN’ timi a si. Pathian hrimhrim nih a rak hman thawk cangmi biafang, ‘KAN SER LAI’ ‘KANMAH MUI’ tbk hi aa dawhtukmi biafang cu an si. Cucaah Baibal Thiang nih teamwork kong ah zeitindah a kan cawnpiak timi zohrihhmanh u sih.

TEAM WORK THIAM CU PATHIAN NIH A KAN FIALMI A SI. Teamwork a thawktu Pathian nih a sermi minung hna zong teamwork thiam ve ding hi a kan fialmi a si. A bia ah fiang tein kan hmuh ko hna. “Pahnih cu pakhat nak in an ṭhahnem deuh, zeicahtiah an ṭuanmi rian khan tam deuh an hmuh khawh. Pakhat kha tluk sual ahcun pakhat nih khan a bawmh khawh.

Sihmanhsehlaw mi pakhatkhat cu amah lawng a si i a tluk sual ahcun a poi ngaingai ko, amah a bawmtu ahohmanh an um ti lo. ..Pakhat lawng a teitu ral kha pahnih nih cun an rak doh khawh lai. Thumthlak hrihrual cu chah a harmi a si” (Phungchimtu 4: 9-12). “Thir nih thir a harter, mi zong nih midang fimnak kha a harter ve” (Phungthlukbia 27:17). “Zeicahtiah kannih cu Pathian ca i hmunkhat ah rian a ṭuan ṭimi kan si” (1 Korin 3:9).

TEAM WORK CU TINHMI PAKHAT NGEIMI CHUNG AH UM A SI. “Khrih cu lu a si i amah chung ahcun pum cu a ningpi in aa khing. Pum chung i a ummi hliah le caang vialte nih pum cu kekkuai lo in an ṭem an ṭawn i pum chung i a ummi nge hna nih anamah le an tuah awk cio an rak tuahnak thawng khan, pum cu a ningpi in dawtnak in a ṭhang (Efesa 4:16). Kan lu a simi Khrih lei ah a lamkip in kan tthan bantuk in CHUNGKHAR DIRHMUN IN, BUU DIRHMUN IN, MIPHUN DIRHMUN IN kan tinhmi mission tlamtlinnak ding ah a lamkip in kan tthan ding kha teamwork nih aa tinhmi cu a si.

TEAM WORK CU ṬUANHAWI ZAWNRUAH TIK AH A ṬHAWNG KHUN. Teamwork ahcun duh zong duhlo zong ah lungrual tein ttuan kan herh. Enteinak, mahzawn lawng ruahnak, uahnak, midang zeirellonak pawl cu hmunhma an ngei lo. Zawnruahnak le khatle khat upat ipeknak tu nih a fehter.

“Pakhat le pakhat i enteinak le mah pumpak thangṭhat kawlnak kha nan lak ah umter hlah u. Toidornak lungthin tu kha ngei cio ulaw midang nak in ka ṭha deuh tiah zeitikhmanh ah vaa ruat hlah u. Cun midang duhning kha hmuh thiam i zuam ulaw nanmah duhnak lawng kha ruat hlah u” (Filipi 2:3-4). “Pakhat le pakhat kan i dawt khawh nak hnga le thilṭha kan i tuahpiak khawh nak hnga, i bawm thliahmah u sih” (Hebru 10:24).

TEAM WORK CU PAKHAT LE PAKHAT RUAHNAK I CHEUH TIK AH A ṬHAWNG CHINCHIN “Cutik ah Jethro nih cun a leh i, … ruahnak in cheu tuahning, ka bia cu ngai tuah, Pathian nih in umpi ko seh. Nang na rian cu mi zapi Pathian sin i chuahpi a si. Sihmanhsehlaw thil ti kho kha na thim hna lai i mi zapi hruaitu ah na chiah hna lai: a thong bu … a za bu … sawmnga bu … le pahra bu hruaitu tiin na chiah hna lai. annih cu Pathian a ṭihmi, bochan awk tlak a simi an si lai, nawhthuh pek khawh lo mi an si lai” (Exodus 18:17).

Teamwork a thiamlo mi cu midang ruahnak a la duhlo mi an si deuh. Hruaitu pei ka si cu, lu pei ka si cu, a thiambik le a hngalbik cu keimah pei ka si cu timi ruahnak a um chung paoh cu midang ruahnak a lut kho ti lo. Cucaah teamwork ah an der chin lengmang. Moses uar a umnak cu midang ruahnak a laak duhmi hi a si. Keimah hi Pathian nih a kan tonmi ka si, keimah hi biapi cem ka si, keimah hruaining le ruahning pin ah thiltha dang a um ti lo tiphun in rak um sehlaw Kanaan ram an lut kho lo men ko lai. Teamwork a thiam caah rianphawt a thiam i, midang ruahnak tha tein a laak duh caah Israel mi a hruai khawhnak hna a si. John Maxwell nih cun, hruaitu kan si cangka in ruahnak petu midang kan ngeih colh mi hi biapi tukmi a si e, a ti.

TEAM WORK A ṬHAWNNAK CU MAHLE PAHRANG CIO KAN HMAN THIAM TIK AH A SI. “Mi kha laksawng a petu hna cu amah kha a si; a cheu cu lamkaltu…a cheu cu profet …a cheu cu Thawngṭha chimtu …a cheu cu pastor le cawnpiaktu ah a ser hna. Khrih pum kha ṭhanter awk ah Pathian nih ..a timh hna” (Efesa 4:11-12). Teamwork ahcun mahle pahrang cio hmual ngei ngai in hmanthiam a biapi fawn. A pahrang a silo mi pi hmun ah rian pek le hmunhma pek phun kha kan hrial hrimhrim a herhmi cu a si.

TEAMWORK CU NGAIHTHIAMNAK LE DAWTNAK NIH A ṬEMTIK AH A TLING. Itheihthiamnak le ingaihthiamnak hi teamwork ahcun a muru ngaingai a si ko.”Zeidang vialte nak in, pakhat le pakhat lungtak tein i daw u, zeicahtiah dawtnak nih cun sualnak tampi kha a khuh khawh. Pathian sin nan hmuhmi laksawng kha midang ca ṭhatnak ah hmang cio u” (1 Peter 4:8).

“Lungthli in i uamnak le thinhunnak le ingpuannak kha hlaw hna u. .. Pakhat le pakhat cung ah zaangfahnak lungthin le nemnek lungthin ngei ulaw Pathian nih Khrih thawng in an ngaihthiam hna bantuk in pakhat le pakhat i ngaithiam u” (Efesa 4:31,32). TEAMWORK CU PA SUNPARNAK PE TU A SI. Teamwork ah aa dawhbikmi cu midang credit pek thiam kha a si. Credit pek ding hi Pathian lawnglawng a si. Cun, Pathian nih a hmanmi hna vialte kha credit pek ding an si. Hruaitu cheukhat cu hruaimi hna cu chim lo tuanpi hawi cung hmanh ah credit pek an i harh tuk tawn.

“Khrih Jesuh lam hmuhsakmi nan zulhnak thawng in nannih lak ah lungthin khahnak a um khawh nakhnga, lungsaunak le lungthin ṭhawnnak hram Pathian nih in bawm ko hna seh. Cuticun lungkhat tein kan Bawipa Jesuh Khrih i a Pa Pathian cu nan thangṭhat khawh lai” (Rom 15:25-26). “…zei nan tuah hmanh ah nan ei ah siseh, nan din ah siseh, nan tuahmi cu a dihlak in Pathian thangṭhatnak caah siter ko u” (1 Korin 10:31). Amen.

Ulenau hna, MIPHUN RIAN KAN TUANNAK AH KHRIFABU RIAN KAN TUANNAK AH, ZATLANG RIAN LE CHUNGKHAR RIAN KAN TUANNAK AH Pathian nih a kan pekmi hmunkhat rianṭuan thiamnak (teamwork) hi kan cawnpeng huam ahcun teinak tlamtlinnak kan hmuh hrimhrim ko lai. Bawipa sunparnak caah si dih ko seh. Amen. Khrih ah nan hawi, Thawngling Mualhlun CEBC Indianapolis

Leave a Reply