2020 April 16, zaanlei suimilaam 6:15 hrawng ah li aa hnin i zaanlei suimilaam 7:30 tiang ah a tanglei bantuk in kan theih khawhtawk a hnursuan mi kan hun langhter. Pakhatnak ah Hakha Auto Store thil zuar mi cheukhat an tla, an kuai. Pahnihnak, UPC Biakinn ceiling a kak, electric Meithei zong tlak dawh a si. Pathumnak, Chin Ramkulh Pehtlaihnak Zung, Hakha (Public Relations Department) vampang a kak, tithiang khonnak dur a tla. An bizu cabuai an tlu. Palinak, Hi kan langhter khawh mi pinlei ah inn cheukhat inn cu a sawn mi, innchung thilri a tla i a kuai mi an um tiah kan theih.

Hi kong ah Myanmar ram Nikhualei Tahnak Zung (Department of Meteorology and Hydrology Myanmar) nih hitihin a thanh. “2020 April 16 zaanlei suimilaam 6:15 ah second 25 rau in lihninhnak (Earthquake) a cang. Hakha in aa thok i Nichuah Chaklei meng 27 tluk a hlatnak a pawngkam (Myanmar ramchung), Falam in Nichuah Thlanglei meng 24 tluk a hlatnak, N.latitude 22.74, S.latitude 94.01°, a thuh lei ah 12 km, a thazaang (magnitude) 6.1 a si mi li aa hnin,” tiah a thanh.

Thantlang lei siseh, Falam lei le Kalaymyo lei zong nih, “Kan theih chung ah nihin bantuk lihninh fah a um bal rih lo,” tiah an chim cio. Tlakrawh inn zong aa thui i innpa chakthlang lau lengmang in leng ah an chuak. Lam a kal lio mi, motor le motorcycle a khaal cuahmah mi zong lamlai ah lau ngai in an um hna, tiah kan theih.

Ralrinnak: “Li aa hninh tik ah leng (vawlei lak) ah na chuak lai lo. Ihkhun tang, cabuai tang, tibantuk ah rianrang tein na luut zokzok lai,”—Lihnih lei Ralrin Peknak Cathanh. BiakilhleNawlnak: Hmanthlak kan langhter mi hna hi facebook cahmai ah kan hmuh mi poh kha kan hun char mi an si. Credit kan in pek manh lo mi hna nih a ruah zia kan thiam hram u! Cun, kan langhter mi a diklo mi a um ahcun comment in kan chim ulaw kan remh than lai. Credit:The Hakha Post