Thantlang ummi nan chungkhat rak cio zokzok hna uh biatak tein i ralrin a herh hih

Chin News

Breaking:Thantlang ah COVID-19 mizaw pakhat hmuhchap a si. Chin Ramkulh Thantlang khua ah 2021 January 11 ah COVID-19 mizaw pakhat an hmuhchap tiah, January 11 ah kan theih.

Image may contain: one or more people, people standing and outdoor

“Atu COVID-19 zawtnak A ngei thar mi hi Kawl miphun a si. Kalaymyo lei in riantuan ah Thantlang a ra mi a si. Anih hi a tlun lecangka in facility quarantine chiahcolh mi a si. Tuzing ah minung 35 quarintine chiah mi kha kan chek hna i cu chung ah atu i zawtnak hmuh mi lawng hi positive a si, a dang kha cu negative an si dih ko.

Image may contain: people playing sport, tree, outdoor and nature

“Atu hi RDT ti mi rianrang tein a phichuak aa theicolh mi in kan chek hna. Mah hnu ah a taang mi 34 hi PCR in kan chek than hna lai,” tiah Thantlang COVID-19 kong tawlrelnak ah tuanvo ngei mi Salai Sang Bawi nih The Hakha Times ah a chim.

Thantlang khua ah COVID-19 zawtnak a ngei mi minung 3 an si cang i an dihlak in Thantlang sii-inn ah thlop an si tiah kan theih. Biakilh: Credit pe loin copy paste kan sianglo. Source: The Hakha Times

Note: Hi thawngpang cu Hakha ummi Media hrambunh pakhat a simi The Hakha Times nih a taarmi kan von taar chinmi a si.

Thawngpang dang rak rel chih: Upatnak cu a hmuh a har i a thlau a fawi! Kan hnu kum i Hong Kong rammi nih an cozah sin ah duhlonak fakpi in an rak langhter lio ah khan, US cozah lutlai pakhat a simi Pi Nancy Pelosi nih China cozah nihsawhnak le soiselnak ah, “Hong Kong mipi nih China hipmi Cozah an buai hnawh lulhmi cu zoh a dawh hringhran” tiah a rak chim.

Cu lio ahcun, US cozah cu a rak dai, a rak nuam i ram mipi nih an rak upat ngaingai rih hna caah, China nih zeihmanh an rak chim ngam lo. Aw…, zeiti awk ttha; kan sining a si ko, ti phun khin an rak um. Sihmanhsehlaw caan sau hmanh a rauh manh hlan ah, ram mipi nih US cozah cu zohchia in an buai hnawh ve hna i an zungpi zong an bauh dih, an MP pawl zong an dawi dih hna i hlan lio ah ram mipi nih buai hnawh ruang ah China cozah sin i nehsawhnak bianek a rak chimtu, house Speaker, Pi Nancy Pelosi le bang cu a laptop tiang in an chuh ai!

Cucu an hmuh tikah, China nih US cozah zong kanmah bantuk an si ve ko hih, an ti i an hun leh ve cang hna. “US cozah zungpi ram mipi nih an luh hnawh i an bauh dihmi cu zoh a dawh hringhran” tiah an ti ve cang hna. Hihi thil kalning taktak a si. Thil dik zong a si fawn. Midang cawnpiaktu kan si zongah, “nan tuah awk a si” kan timi hna kha kanmah nih kan tuah ve lo ahcun an kan upatnak cu automatic in a tlau ko.

Minung hawi nih upatnak le ttihzahnak timi hi kan chimmi bia le kan cawnpiakmi biatak kan i nunpinak theipar an si bik. Mirum, mi thiam le mingan si ruang ah upatnak hmuhmi cu sau a deih lo; nikhat hnih ah a tlau dih. Sihmanhsehlaw kan bia le kan cawnpiaknak bak kan i nunpi ruangah, kan hmuhmi upatnak le ttihzahnak cu saupi a hmun. Nain zungzal a hmunh khawh nakhnga, a zungzal in nunpi peng a hau ve!

Nunzia kong ah cho chuah a um lo; nun chung vialte pehzulh in le thlahdorh bak loin nunpi peng a herh. Dinfelnak he kum tampi a nung i midang nih upatmi kan si zong ah, voikhat chuah sualnak nih zeirel lomi paiper chung ah a kan chiah diam khawh ko.  Kan Lai phungthluk ah “mi thin sau thin hun cu ttih a nung” timi kan ngei. Voikhat an kan ti, kan ngaihthiam hna. Voi hnih an kan ti, kan let hna lo.

Voithum an kan ti, warning kan pek hna. Voi linak an kan ti ahcun khuapi tlaih hau in hmual kan pho tawn. Cu bantuk cu cho a chuak lomi lungsaunak le ngaihthiamnak a si. Ngaihthiam lo nak hmanh in ttih a nung deuh. Voi thum tiang ngaihthiam hnu ahcun, voi zeizat tiang poh ngaihthiam lawlaw khi a har tuk hlei ti lo.

Nain a har tuk hlei ti lomi pehzulh kan duh tawn lo ruang ah, tlawmpal kan thil ttha tuahmi cu nihchuak le capo ah an cang tawn! Upatnak le ttihzahnak cu harsa tuk in hmuhmi an si nain fawi tuk in thlau peng khawhmi an si caah, thlahdorh sual lo tein kan ven zungzal a herh! Lawmhnak he, Hram Bik Lian

Leave a Reply