Thantlang khuachungah Vok zawtnak athok hi thla (3) chungah Vok (150) renglo an thi cang. Market ah thahding mi Vok angan dam mi asipinah market vok paohpaoh cu caan zeimawzat adang tein kan chiahter hna nain atu lio Covid.19 zawtnak avun i thuatthan tikah Market Vok sathanak thla 10.4.2020 thokin Market Vok sathahnak zung kan khar chung rih lai mipi thawng kan inthanh hna. Credit: Van Zauk Fambawl

 

Thantlang Khua Vok An Thih Tuk Caah Market Ah Vok Pumkhat Nithum Tiang An Zuar Caan Um. Thla khat chung tluk Thantlang khuachung ah Vok pulh rai a tlung i sa a caw mi an tlawm tuk caah Market sa zuar mi nih Vok pumkhat ni thumchung tiang an zuar caan zong a um tiah theih a si. Zarh khat chungah a tlawmbik Vok 6 thah in zuar tawn mi Thantlang Market cu a tu lio ah cun Vok an pulh in an thih tuk caah zuar khawh ti lo in harnak fakpi an ton hi a si.

“Zawtnak um hlan ah cun zarhkhat ah vok 6/7 hi cu kan thah peng ko. A tu lio ah cun vok ngan deuh, sum 6 hrawng hi cu zarhkhat ah pa hnih lawng kan thah khawh cang. A ngan deuh mi hna bang cu tikhal kuang ah kan chiah i Vok pum khat khi nithum chung hna kan zuar can a um.”tiah sathahnak tlai tu Nau Cung nih TCP ah a chim.

Hi kong he pehtlai in Thantlang khua saram thlop bulnak zung lei zong nih a hlankan runvennak sii (ka-kuai-sii) ‘Hog Chlolera’ timi Virus thahnak zong Vok 1000 reng lo an chunh piak cang hna. “Atu lio Vok zawt rai hi zeiruang bik ah dah a si ti cu kan hngal rih lo, khua caan ruang ah a cang mi a si lai tiah ruahdamh a si. A si nain a hlankan runvennak sii a si mi ‘Hog Chlolera’ timi zong vok 1100 sinah kan chunh piak cang hna. Hi sii cu Vok a zaw tuk cang mi, sii va chunh mi pawl khi cu an dam tuk ti lo, an thi than ko.”tiah Saram siibawi Lian Bawi nih TCP ah a chim. Credit: The Chinland Post