Caṭialtu: Salai Van Bawi Lian (Martin)

Dear Upatmi miphun hawi hna, Chin National League for Democracy (CNLD) ah chungtel tling ka si bantuk in le atulio Hakha peng aiawh in chimnaknawl ngeitu (Spokesperson) le mino hruaitu (youth leader) a tuan mi ka si bantuk in Chin National League for Democracy (CNLD) Party in MP kaa cuh lai.

Keimah pumpak ‘nihin ramkhel ka cuanhnak’ cung ah ramkhel lei hmuhtonnak a ngeitu nu le pa, fimthiam hna le hawi le kom he biaruahnak ka ngeih hnu ah Thantlang Peng Pyithu Hluttaw hmunhma (Constituency) in MP i cuhding ah biachahnak ka tuah. Thantang Peng CNLD EC sin zong ah MP cuhnak ca ka ap cang. EC nih an ka ceihpiak lai i ‘TICKET’ an ka pek lai tiah zumhnak ka ngei. Thazaang pek cio ding in kan sawm hna.

Salai Van Bawi Lian (Martin)

A konglam a tawi a ṭialmi: Keimah ka min cu Salai Van Bawi Lian a si. Thantlang peng, Aibur khuami ka si i ka pa tleicia Pu Lung Peng le Pi Dar Ki nih October 11, 1982 ah an ka hrin. Thangnget phun ka si. Unau pali lakah upa bik ka si. Innchung ka ngei cang i kan nu Pi Iang Chin Tial he fapa Salai Bawi Hrin Lian (Lian Lian) Pathian nih thluachuah a kan pek.
2001 – 2002 kar Falam peng Lumbang ka um lio ah Martin Luther King Jr. kong ka rak rel i ka rak uar tuk caah 2001 kum ah Martin Van Bawi Lian tiah a rak i sak. Cucaah Salai Van Bawi Lian (Martin) tiah ka min ah ka telh chih tawnmi hi a si.

Ka Sianginn kainak cu Falam peng Lumbang khua in tanghra ka awn dih in Rangoon ah kaa thawh. Kum 2007 Dagon Biblical University ah Theology in B.A (Q) ka dih. 2012 kum ah Thailand ram ummi Chiang Mai University ah Community Development and Civic Engagement timi Social Science in Certificate Course cawnnak ka dih. Kum 2015 ah Thailand ram thiam ah a ummi Chulalongkorn University, Faculty of Political Science i Development Studies in (Master Degree) ka lak.

Ka Master Thesis hi Hakha Vawlei hmunhma le Ti kong tawlrelnak le policy ka tial tikah an ka uarpiak tuk. Cu caah Chulalongkorn University i Center of Social Studies le Association of American Geographer nih an Journal ah a kan chuah piak. Cu lawng si lo in Chula University in Professor pahnih nih ka Thesis cu a thatuk an ti caah Hakha tiang an rak tlung i Hakha ti kong le vawlei hmunhma kong cu research an rak tuah ve.

Ka rianṭuannak pawl hi kum 2005 in sianginn kai pah in cachim rian ka thok. Dagon Youth Development timi Dagon ummi mino thanchonak ah Director le Sianguk zong 2005 – 2010 tiang ka rak tuan. Culio ah thal caan sianginn khar paoh ah Laitlang le khuate lei abik in Aibur le Thantlang khua ah Mirangca chimnak kan rak tuah. Kum hnih thum tiang peh in kan rak tuah kho. Kum 2010 bel in CACC tang ah a ummi Children Development Project (CDP) timi ah Chin ram ngakchia fim a cawngmi bawmhnak ah Coordinator kum 2012 tiang ka rak tuan. 2010 hnu Kawlram NGOs a lar hnu bel hin cun ka riantuannak a tam ngai.

CACC tang rian in kaa dinh hnu ah Rangoon ah a ummi Czech Republic NGOs a simi People in Need timi bu ah Field Officer in 2012 – 2014 kum tiang ka tuan. Cun 2015 Kawlram thimnak an tuah lio ah Asia ram ah thimnak lei riantuannak bu a simi ANFREL ruahnak petu le holh letu cu thimnak an tuah lio ah ka rak tuanpiak hna. Cun England ram hrambunh a si mi International Institute of Rural Reconstruction timi NGO (Abik in Kawlram khuate ummi caah thanchonak rian a taunt bu) ah Kawlram ai-awhtu Country Program Officer 2017 – 2018 tiang kum khat chung ka rak tuan.

Ramrian lei luh ka duh caah Rangoon um cu aa rem deuh lai lo tiin 2017 kum ah Hakha ah ka rak i tthial. Hakha ka phanh in RC ngeihmi KMSSS ah Manager 2017 – 2018 kum (kum khat le cheu) tluk ka tuan. 2018 kum a dih lai ah World Bank nih Kalay-Hakha lam remh ding ah an tuanmi Project ah kaa thial i nihin tiang World Bank i Hakha – Kalay Lam Project in cun Environmental and Social Impact Assessment (ESIA) ah Specialist (thiamsang dirhmun in) le Field Supervisor he pahnih in kemh in ka tuan chih.

Atu ah kaa timh bantuk in ka caan a phan cang tiah ka ruah caah aralaimi 2020 Kawlram thimnak ah MP cuh kaa tim hi a si. Miphun riantuannak le hmailei kan ram sersiamnak ah kaa tlaihmi le sehchihmi tlaihtleng (motto) cu “Dinfelnak le Tanrualnak in Ram Sersiam” tihi a si. Pathian tihzah bu le miphun le ram dawtnak he ka si khawh tawk in pumpek kaa tim.