Kan farnu nungak Sui Hlei Ṭial thawngpang cu online in a ho cio paoh nih theih cio mi asi. A ho cio paoh kan lungfak cio hna. Nungak Sui Hlei Ṭial ruak a khamtu hna le lamkam a phumtutertu hna Thantlang nawlngeitu hna cunagah duh lonak langhter le an cungah aa tlaknak in dantat si hna seh tiin Mino nih an tawlrel cuahmah lio a si.

Thantlang Mino phu ṭhihruainak in Central Acozah Nyapidaw ah cakuat an timh i cakuat ahcun khua mipi lungtlinak Lethmat an lak cuahmah lio a si tiah kan theih. Lethmat cu, pumpak in siseh, a phu in zong siseh tel khawh a si i, Thantlang, Halkha, Falam le Chinram hmun dangdang ah lak cuahmah a si.

Central Acozah Naypidaw i ca an kuat dingmi cu nungak Sui Hlei Ṭial ruak kongah Lai phung tein thlanmual ah vui a duh lotu hna ṭuanvo ngeitu an dihlak in an i tlakning in hremnak pek dingin nawlnak le halnak a si. Central Acozah sinah Thantlang Mino phu nih can kuat lai i lungtlinpitu mipi lethmat zong telh chih dih ding a si.

Lungtlinpitu mipi Lethmat cu, Thantlang, Halkha, Falam le Chinram hmun dangdang ah inn kip pal in ah hal cuahmah lio hna a si i pumpak lungtlinnak zong in lethmat zong lak cuahmah a si. Ahohmanh hramhram in a forhnak a um lo i, mah lungtho tein minthut (lethmat) tuah khawh a si. Central Acozah Naypidaw ah kuat dingmi Lethmat cu Falam khuapi zong ah inn kip pal in Lethmat cu an tuah i minung 100 fai Lethmat a petu an um cang tiah theih a si. Lethmat cu tuzarh cacawn ni 5 tiang tuah a si rih lai i zarh dongh ah Central Acozah sinah kuat a si lai.