Thantlang Khuapi Cu Dawn Khua Ah Ṭhial Ding In Chin Ramkulh SAC Cozah Nih Timhtuahnak An Ngei! SAC ralkap nih an khangh i an hrawh dih cang mi Thantlang khua cu a thar in sersiam ti loin, India le Thantlang ramri Dawn khua ah ṭhial ding in SAC ramkulh cozah nih timhtuahnak a rak ngei, tiah Mizzima nih a ṭial.

Thantlang ṭhial an timhnak hmun, Dawn khua cu India le Myanmar ramri Tio tiva kam ah a ummi khua pakhat a si i, inn 250 hrawng umnak khua a si. “A luancia June 30 ah khan Chin ramkulh cozah nih Thantlang khua remh le sersiam ṭhannak ding kong ah tonbiaruahnak an rak ngei. A rawkmi Thantlang khua cu sersiam ti loin, hmundang ah ṭhial ding in a rem hnga maw, tiah ramkulh cozah nih rampi(Union) cozah sin ah halnak a tuah.

An chim ning ah cun ramri zong a si caah India he i pehtonhnak ah a ṭha, tiah an langhter nain, rampi cozah nih lungtlinpi lonak cakuat a leh hna,” tiah min langhter duh lo mi pakhat nih a chim. Thangtlang um SAC ralkap hna nih Thantlang khua cu voi 35 tiang an duah caah, Thantlang khuachung inn a thong leng a kang i, mipi dihlak cu India ram le ramri lei ah ralhrial in an um hna. The Chin Post:

Thawngdang: Chin ramkulh, Mindat ah SAC ralkap nih Mindat-Pakokko lam Shwe Ngyaung Aye minung phortu khualtlawng motor pakhat cu a chung cuangmi minung he August 17 ah an rak tlaih hna i, nihin August 21 tiang ah an thlah rih hna lo, tiah tualchung mi nih an chim.

Cu khualtlawng motor cu an tlaih hnu ah motor khaltu le a zultu cu an thlah ṭhan hna nain, motor chung cuang khualtlawng mi hna cu ni 5 a rauh tiang ah thlah rih lo in, Mindat khuachung SAC 274 battalion ah an hren hna, tiah theih a si.

SAC ralkap nih khualtlawng motor pakhat ah khualtlawng mi minung 7 an tlin lawng ah motor chuahnak nawl an pek hna i, SAC nih rikhiahnak an tuahmi zat minung an tlin lo a si ahcun Mindat in motor chuahnak nawl an pe hna lo, tiah theih a si. Cu pin ah Tualchung hriamtlai phu CDF-Mindat hna cu SAC ralkap nih an sin ah lut ding in atu le tu an lem hna, tiah theih a si.

“SAC ralkap nih khualtlawng motor an tlaih mi ah cun minung zeizat dah tlaih an ton fiang tein theih a si rih lo. Motor khaltu zong nih thil sining a chim duh lo. Mindat um SAC ralkap nih CDF hna cu anmah lei ah ṭang ding in an lemsoi hna,” tiah khuami pakhat nih a chim. SAC ralkap tuahsernak ruang ah Mindat in hmundang ah a zaam mi minung 9500 hrawng cu kum khat leng a rauh tiang anmah umnak hmunhma ah an kir kho rih lo, tiah theih a si.