Malaysia ah inn dot cungin a tla i a nunnak a liammi kan farnu Sui Hlei Ṭial ruak cu Malaysia in Laitlang (Kawlram) leiah tlunpi a si. Malaysia leiin Covid-19 zawtnak a ngei lo timi catlap he a ruak cu tlunpi i a si i, Yangon zong tlamtling tein phakpi a si.

Cuticun Yangon in a chuahsemnak Thantlang ah tlunpi ṭhan a si. Asinain, Thantlang Covid-19 Main Committee lei nih nungak Sui Hlei Ṭial ruak cu Thantlang khuachung luhpi an sinah hna lo. Lamkam ah a ruak vui a si. Nungak Sui Hlei Ṭial ruak Thantlang luhpi a duh lo tu hi Thantlang Khuabawi pa Pu Tum Bik a si tiah theih a si.

Nizaan ah The Hakha Times nih Zoom in kan nannu Sui Hlei Ṭial ruak kong he pehtlai in biaruahnak an ngeihnak ah amah hrimhrim nih a duh lonak kong fiang ngaiin mipi hmaiah a chimmi hmuh khawh a si. Hi kong ah Thantlang Khuabawipa Pu Tum Bik cu Australia ummi tlangvaal Carson Twintwin nih atanglei bantukin biahalnak a tuah.

Mr Tum Bik Biahalnak

COVID-19 runvennak ah, mithi ruak “lam kam” vui le thlanmual vui ai dannak zeidah si?

Thlanmual vui cia mithi ruhro zawtnak kai lai nan phan caah maw, Sui Hlei Ṭial hmun dang ah nan vuiter hi a si?

Mithi siloin minung zawn kan ruah caah a si nan timi ah, mithi chungkhar thinlung na ruat hna maw? Annih teh, minung ah maw na chiah hna, mithi ah dah na ruah hna?

Cun mithi ruak thlahtu nan țihțanh hna ruangah lam kam nan vuiter țung hna ah, ruak vuitu khua chung na luhter fawn țung hna, hihi zeidah na duhnak a si?

Sui Hlei Ṭial hi COVID-19 a kai lo timi fiangte na hngalh ko bu ah, COVID-19 thipul hmuh in thinghmui bang na hlonh (fimtawl lo) hi Kawl pawl he lung i hmuh ruang ah a si maw?

Mipi ca ah maw rian na țuan, zapi ca dah na țuan? (Hihi a bik in ka let te).

Biahal ding a dong lo.

Carson Twintwin