Thantlang sianginn sang ah inn pathum a kaang, putar pakhat le ngakchia pakhat an thi——————————————————————————————————————————————Thantlang sianginn sang JMBC hnulei ah inn thum cu tuzing January 12 suimilaam 2:00 hrawng ah a kaang i kum 90 minung Pu Chawn Lian le kum 10 pangakchia Simon a kanghchih hna i an thi.A kaang mi inn hi Tlangte khuami Pu Kep Tu inn, Salen khuami Pu Sui Peng inn, Sihcaang khuami Pu Ngun Bawi inn hna an si.“A thi mi Pu Chawn Lian le Simon hi Pu Kep Tu te chung an si. Annih hi inn tang dot ah an it i mei a thawhnak a si ca ah an chanh manh hna lo. Cung dot ah a it mi nu pahnih cu thlalang-awng in an zuannak ah an i khawng i sii-inn ah an chiah hna. Mei zong nih tlawmpal cu a hliau hna,” tiah sang upa Pu Rual Uk nih a chim.Mei hi Pu Kep Tu te inn coka in aa thawk. Asinain zeibantuk in aa thawk ti theih a si rih lo. A kaang mi inn hi thing inn an si i inn hnih cu zeihmanh chuah manh lo in an ciam dih i inn khat zong cu a tamdeuh a kaang. Pu Chawn Lian le Simon ruak cu nihin ah Sianginn sang thlaanmual ah vui an si lai tiah khuami sin in thawng kan theih.

Posted by The Hakha Post on Saturday, 11 January 2020