Thantlang i hibantuk thil a um cu ngaih a chia tuk hringhran

Chin News

Thantlang Taungzalat Car Gate An Bauh Thil Zeimawzat Tlau. Chinram Kulh Thantlang Taungzalat Car Gate mifir nih an bauh tiah theih a si.Chinram kulh Thantlang Taung Za Lat Car Gate cu febuary 24 zing suimilam 1:30AM hrawngah a ho ti theih lomi nih an bauh i thil zeimawzat a tlau tiah theih asi.

Hi thiltlau nak kong he pehtlai in bauh piak a tongmi Taung Za Lat Gate hmu Hlawn Hlawn nih “Covid-19 pulrai ruangah voidang tawn bantuk in Gate kan kai kho ti lo. Asinain Kungkaa(Truck) pakhat te kan ngeih caah a caan tete ahcun an kal tawn i mawtaw mong pawl tawh kan kenter lawlaw hna. Keicu ka kai lonak sau pah cang.

“Tuzing cu phone an van ka chawnh i Gate an bauh caah na thiltlau mi hna um hnga maw rak check tuah law an ka ti caah ka va kal zokzok i Caku bawm ( ciat pha) nganpi in Nga Car kan chiah mi bawm hnih a tlau. A ho ta si theih ti lomi Online Shop a tuahmi thilkuat KungKaa nih a phorh mi thil zong a tlau. Zeizat man a si cu ka hngal lo. Cun a dang dang thil pawl zong an khehhlai dih ko nain cauk tibantuk lawng a si caah an fir lo” tiah’ TCP ah a chim.

“Car Gate ah Gate hngak zong a riak ko nain hibantuk in an bauh hi ka thei bak lo. An bauh caan 1:30AM hrawng ah si ko lai tiah a ka chimh” tiah a chim. 2021 Febuary 24 zing suimilam 1:30Am thiltlau lio ah Aye Chain mawtaw Desiel zong tam ngai a tlau tiah kan theih caah Aye Chain Gate tuanvo kan pehtlaih ko hna nain kan chawnh khawh hna lo caah thawngtling kan hngal kho lo.” tiah a chim. Source: The Chinland Post

Thawngpang thar rel chih: World Bank nih SAC sin ah tangka thohnak nawl phihchung na si, tiah a thanh. The World Bank nih State Administration Council (SAC—Media ngan mi nih cun, Ralkap Council or Nawlngeihnak latu Ralkap Cozah) tiah an auh mi cu tangka thohnak nawl phihkhar chung na si, tiah February 22 ah khan ca a kuat cang i cucu Social Media ah a puanglang.

No photo description available.

SAC nih Planning and Finance Minister thar ah rian a pek mi U Win Shein le Ministers dang hna sin ah copy pek in tangka thohnak nawl an phihkharnak kong World Bank nih ca a kuat hna. Cucu, Nay Pyi Taw Planning and Finance Minister Zung in Officer pakhat nih a dik mi thawng a si ko, tiah a fehter.
February 22 ah SAC nih P&F Minister U Win Shein sin ah Word Bank in Cambodia, Myanmar le Laos ram hna Country Director a si mi Mariam J Sherman nih ca a kuat mi a si. February 1 te khan World Bank kan policy nan buar ca ah cu hlan kan in kuat mi hna zong a herh tuk mi lawng ah hman a si lai. Simanking ah hman lo ding mi tangka cu kan laak than dih lai,” tiah ca a kuat.

“World Bank he rian tampi tuan mi kan rak ngei. Khuate thanchonak rian pin ah thanchonak rian dangdang zong tampi kan rak tuan. Cucu, NLD Cozah chan ah khan a si. Asinain February 1 in phihkhar than a si tik ah tangka zong thoh khawh a si ti lo. Hmailei ah thanchonak riantuanti ding zong a um ti lo. Tangka zong cawi khawh a si ti lai lo. Phundang cun, SAC hi World Bank nih an cohlanglo tinak a si ko,” tiah Nay Pyi Taw um P&F Minister Zung Officer pakhat nih a chim.The Hakha Times (Ref: Khit Thit Media)

Dr. Sasa a rian in aa phuak: Dr.Sasa cu CRPH (Committee Representing Pyidaungsu Hluttaw) nih UN Palai ah an thim caah a rianṭuannak Health and Hope UK (HHUK) CEO sinak in aa din/phuak tiah theih a si. Cunglei nih an phuahmi si loin amah tein dinnak caa ṭialin aa din/phuakmi a si.

No photo description available.
A rian a dinhnak ca a ṭialmi! Dr.Sasa nih rian a dinhnak kong he pehtlai in hitihin a taarlangh “Dawtmi mi ralṭha, hawikom le chungkhar hna, nan ka dawt, nan thazaang nan peek hleiah thla nan ka piaknak caah ka lawm tuk hringhran. “Keimah nih ka dirh(Organize) i kum 13 chung ka rianṭuannak bu von chuah taak/dinh taak cu a har ngaingai. Nain United Nations (UN) caah Myanmar palai an ka thimmi rian thar hi biatak tein le felfai tein ṭuan ka duh caah si.

“Hi ka rian thar hi a har tuk lai ti ka theih ko. Asinain, caan saupi a rak temtuar cangmi kan dawtmi Myanmar kawh-auhnak hi ka al kho ti lo. Zaangfahnak in nan thlacamnak le na lungthin chungah ka philh hram hlah uh. Pathian nih Myanmar thluachuah ko seh,”tiah Dr.Sasa nih a rian a dinhnak a taar hi a si.

Rian a dinhnak ca a ṭialmi, “Ka upatmi hruaitu le rianṭuan hawi hna. UN caah Myanmar palai an ka thimmi nan ka lawmhpi ruangah ka tuk hringhran. Myanmar mipi cu caan saupi a rak temtuar cangmi an si. CRPH nih United Nations (UN) Palai ah an ka thimmi ka caah a sunlawi tuk hleiah a biapi tukmi a si fawn. “A biapi tukmi tukmi ka rian thar ṭuan le tlaih pah in ka rian pakhat Health and Hope UK rian hi kemh chih ning law buainak a um khomi a si ti ka ruat. Cucaah Healh and Hope UK ka rian in ka dinh rih lai tiah theihter kan duh hna.

“Kum caan saupi chung nan sinah rian ka ṭuan khawhmi le ka teltum khawhmi cu ka caah a sunglawi tuk hringhran. Ngandamnak, fim cawmnak le ei le din leiah nan thazaang peeknak an herh chinchin lai. Ka dirhmun nan ka theihthiam piak caah ka lawm tuk hringhran,”tiah a ti.

Dr.Sasa cu CRPH (Committee Representing Pyidaungsu Hluttaw) nih UN Palai ah an thim. Hi kongah Dr.Sasa nih,”Myanmar mipi nih democracy phungning tein an thimmi MP pawl nih Rampumpi Hluttaw Aiawhtu Kawmiṭi (CRPH) an dirh i United Nations palai ah an ka thim,” tiah thanhnak a rak tuah.

Dr. Sasa nih, “mi ralṭha Myanmar mipi aiawhtu dingah an ka thim cu kaa lawm tuk hringhran. Ramdang vialte hna, Myanmar rammi nuai 54 hi kan dirpi ulaw zei tik hmanh ah uknak chuttu ralkap bawi 6 hi dirpi hna hlah uh tiah kan sawm hna. “Hopaoh nih Myanmar mipi duhnak hi upat ding le dirpi hrimhrim ding asi. Myanmar mipi nuai 54 na kan dirpi duh lo ahcun mipi a hremtu le uknak chuttu ralkap bawi 6 hi nan dirpi hna tinak asi.

Mi ralṭha Myanmar mipi nih ralkap hremuknak an dohmi cu teinak lam a panh thluahmah cang, uknak chuttu ralkap bawi le anmah ṭanhtu pawl cu an i chuih lai i an tlu lai, uknak chuttu le anmah ṭanhtu pawl cu tuanbia nih bia a ceih hna lai. “Zei tik hmanh ah a sung kan khan lai lo, zei tik hmanh ah kan sung tiin kan i ap lai lo, Democracy nih a tei lai, Freedom nih a tei lai, Thildik nih a tei lai. Upat awktlak Myanmar mipi le Myanmar ram hi Pathian nih thluachuah pe ko seh,” ati.

______

Copyright © Chin World News Evening

Leave a Reply