Caantling in Thantlang-Hakha khualtlawng motor Chin Taungtan Bus cu tuzing suimilam 7:30 Am tluk hrawngah lamthlang ah a tla i minung 2 an nunnak a liam i, a dang minung 9 hliam an tuar tiah thawngkan theih.

Thantlang, Pu Thang Hrim sia zuatnak pawng ah Hakha-Thantlang caantling a kal mi Chin Taung Tan khualtlawng phur motor 7:30AM tluk ah cangsualnak a chuak.

Thantlang khuami pakhat nih, “Zeitindah a cangsual ning a si ti cu kan thei kho ve rih lo. Minung pahnih a hmun ah an nunnak a liam. Motor khal pa hi a phei a kiak i, ruahchannak cu a um tuk lo,” tiah The Hakha Post ah a chim.

Bus cu Thantlang khua ummi Pu Run Ceu nih a mongh i bus aa citmi hna hi an dihlak in minung 11 an si. A brake poh i caah lamthlang ah a tlaknak a si lai tiah zumh a si. Asinain, thawngpang fiang ngaingai zeihmanh a um rih loh.

Hi Bus eksident nak ah minung pahnih an nunnak a liam i minung 9 hliamhma an tuar. Cun, a nunnak a liammi pahnih hna i pakhat deuh hi kum 30 tluk hrawng a si i pakhat deuh hi upa kum 62 tluk hrawng a si tiah kan theih fawn. Cun, eksident a cannak hmun hi Thantlang in meng (2) hrawng a hlatnak ah a si ti a si.

Thantlang Sipin lutlai Pu Ram Khar,“Eksident a cannak hmun rampi hi ramchia zong a si lo. A lam zong a ṭha tuk ko. Eksident hi zeiruang dah a can ti cu atu tiang theih khawh a si lo. Asinain, kan zumhmi cu Motor thilri a dik lomi a um caah a si lai ti hi kan zumh bikmi a si. Motor hi lamthlang pe 200 tluk ah a tla,” tiah a chim

Eksident a cannak hmun hi Thantlang khua luh lai Pu Thang Hrin siazuatnak ah a si i motor hi lamthlang pe 200 tluk ah a tla. Bus mongtu Pu Run Ceu cu a el kiak tiah kan theih. Minung 9 hliam a pu mi chungin minung pa 5 cu Thantlang sizung ah kalpi an si i minung 4 cu an hliamhma a fah deuh caah Hakha ah lanhpi an si.

Chin ramkulh Acozah leiin Zatlang Vuanci (Social Affairs Minister) Pu Pau Lun Min Thang, Sipin lutlai U Soe Htet, Upadi lei lutlai Pu Sonny Thang Cung, Hakha District lutlai U Aung Ko Oo le a dang rianṭuantu hna nih Ngaihchiatnak a tongmi chungkhar hna le hliamhma a tuarmi chungkhar hna cu sizung ah an va veh hna hnuah thazaang peknak le bawmhnak tangka an peek hna tiah kan theih fawn.

Chin ramkulh Acozah lei nih ngaihchiatnak a tongmi chungkhar hna cu Myanmar Kyats ting 3 veve le hliamhma tuarmi chungkhar vialte hna cu Myanmar Kyats thong 50 cio an pek hna tiah thawng theih a si. Chirhchan: Zalen

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan ṭialmi hi areltu mipi caah ṭhathnem santlaih, theihtleih ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan ṭialmi kan palhnak a um  cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Na relmi thawngpang hna hi midang nih an rel khawh ve nak hnga aṭha tiah na ruahmi a um ahcun share in rak kan bawm ve. Kan ca a kan rel piaktu nan dihlak cungah kan ilawm. Upatnak he Admin