Thailand Biaceih Zung Sang Bik Nih Beih A Ceih Piak Than Nain An Luat Hlei Lo Zaagfak Taktak An Si

Thailand ram beach ah nuva hna thihnak kong he pehtlai in Kawlram mi Win Zaw Htun le Zaw Lyn cu puh hna in tlaih an si i, tuni ah August 29 tuzing suimilam 10:00 in Thailand biaceih zung sangbik a donghnak bik an konglam ceihpiak asi i, Thailand bieceih zung nih cun zaanlei suimilam 1:00 ah thi ding tthiamtthiam in thihdan a pek tthiamtthiam hna tiah theih asi.

 

Kawlram mi Win Zaw Htun le Zaw Lyn cu Thailand biaceih zung nih British rammi khualtlawng pahnih nuva hna thihnak kongah voi 7 biaceihpiak asi i, 2015 December 24 ah thihdaan a pek a cang hna. Cu kong cu nawlnak an tuah lengmang tikah biaceih piak an si. Nain tuni ah Thailand biaceih zung sang bik nih a donghnak bia a ceih piak tthan hna i, an luat hlei lo, thihdan an pek tthiamtthiam hna.

Thailand ram Surat District Beach ah 2014 september thla ah British khualtlawngmi nuva Hannah Witheridge kum 23 mi le David Millerk um 24 mi cu thihnak an rak tong i, cu thihnak kong he pehtlai in cun kawlram mi minung pahnih Thailand ram ah rianttuanmi Win Zaw Htun le Zaw Lyn cu lunghrinh in an rak tlaih hna.

Hi thil a cang hnuah Thiland le Myanmar ramri Yanawng zongah kum 17 mi Thailand ngakchia thihnak kongah Yanawng biaceih zung nih 2018 April thla ah Kawlram mi minung 4 cu thong an rak thlak hna. Asinain biaceih zung nih bia a khiah piak hna cu lungtlin loin biaceih piak an si tthan i, biaceih zung nih June thla ah an pali tein an rak thlah tthan tiah theih asi. British nuva thihnak kongah tlaihmi hna Kawlram mi minung pahnih Win Zaw Htun le Zaw Lyn tuhi cu a tu tiang luatnak ding lam a um rih lo. Source: 7D,Mizzima,VOA