Coronavirus a karhning hi khuaruahhar bak a si. A bik in US ramchung i a karhning ko hi a rang khun. Johns Hpkins University nih thawng an thanhning ah cun, kan hnu zarh chung lawng bak ah khan US ramchung ah minung 100,000 bak an i chap ti a si. Hi novel coronavirus a karh ti lo nak ding caah US ram cheukhat hna le vawleicung ram tampi hna nih heh tiah an i zuam. Minung tampi hmunkhat ah um khawhnak a simi hmun paoh khaar an si. Sianginn, chawlehthalnak hmun, khualtlawn tibantuk hna khaar an si. A si khawhchung in mah le inn cio ah um le khuasak ding in thawng thanh cio a hung si.

Cu bantuk in mipi i pumhkhawmhnak hmun paoh phih le khaarnak in China le South Korea hna ah cun hi zawtnak hi an ramchung ah a karh ti lo, tiah an thanh. A sinain US ramchung tu ah hin cun a tu tiang in state pakhat hnu pakhat in a karh chin thluahmah ko rih. California Gov. Gavin Newsom nih March 19 ah khan inn ah um viar ding in mipi sin ah theihternak a rak tuah ve cang. Khatlei kam in Texas hi zawtnak nih a phanh a hung tlai deuh. Cu caah March 31 ceo ah sianginn pawl le chawlehthalnak hmun pawl hna cu khaar hram an thok ve.

Florida Gov. Ron DeSantis cu minung tampi hmunkhat ah khuasaknak rili kam, chawlehthalnak hmun pawl le mipi he i hlat ding, inn ah um viar ding tibantuk nawl chuah a tlai tiah soisel a tong ngaingai. President he chawnhbiaknak an ngeih hnu April 1 ceo ah inn ah um viar ding in mipi sin ah theihternak a tuah. Boston Children’s Hospital ah a ttuanmi Dr. John Brownstein nih, “Texas hi zawtnak a tam biknak hmun a si te lai tiah ka ruah. Hi zawtnak ai thok ka in nihin tiang a karhning hi khuaruahhar a si” tiah ABC News sin ah a chim. Ref: ABC News