Tei Cangmi Satan Hi A Tihnung Tuk Rih: Billy Graham

Vawleicung evangelist minthang bik Billy Graham cu a tar tuk cang i a cawlcang kho tuk ti lo. Asinain a ti khawh tawk in Pathian rian caah cun dinh a duh lomi a si. Naite ah Satan kong a tialmi a um. A tialmi cu Jesuh Khrih thawhthahnak nih Satan le a thawnnak le hell a teinak kong an si.

Jesuh Khrih thawhthannak nih Satan le a thawnnak le hell a tei dih cang hna nain Pathian nih teinak a kan pekmi a tling dih rih lo. Satan thawnnak hi an rawk dih rih lo. Satan hi a thawng tukmi thlarau pakhat a si bantukin Pathian riantuannak le khuakhaan kham le doh hi aa zuam pengmi a si. Pathian riantuannak le khuakhannak a phunphun in a doh i thlarau minung kan si lo ahcun theihpiak thiam hi a har tuk a ti.

Satan nih a kan tuksawh a kan hlen a kan hrawh a kan thah, cun a phunphun in Pathian fale rawhralnak ding lawng te khua a khaan hna. Bible ah kan hmuhmi cu Ahodah ka seh khawh lai tiah a vakvaimi chandeih bantukin kan pawngkam ah a vakvai lengmangmi Satan a si 1 Peter 5: 8-9 a si tiah a tial chih. A chim thanmi cu vawleicung ah hin thil thalo kan cungah a tlung ko lai, harnak phun kip kan ton ko lai. Kokek harsatnak zong kan tong ko lai. Thlichia le totho zong nih a kan den ko lai. Sualnak ngei lo minung zong a thongthong in kan lo i kan thi ko lai sihmanhsehlaw kan Pathian nih zeizong vialte a uk dih hna a ti.

Zeiruangah dah Pathian nih cu batuk vialte hna cu a kan tonter timi kan thei lo. A caan ahcun Satan ruang zong ah an si kho. Asinain a donghnak taktak i biachahnak ngeitu le Cungnung Bik a si lengmangmi cu kan Pathian a si. Pathian a cawlcang rua lo kan rak ti lio zong ah Pathian nih a rak kan theih dih hirhiar ko Isaiah 57: 15.

Kum 98 evangelist Bill Graham nih a chim thanmi cu Satan cu aa phorhlaw i Pathian tluk si aa zuam. Pathian van arfi cung tiang khin a thutnak cawi aa timmi Satan a si Isaiah 14: 13-15. Jesuh Khrih nih Satan le a thawnnak vialte cu Vailam cungah a tei dih cang. Asinain Pathian fale nih teinak tling kan ngeih rih lo caah Satan kut ah kan thlak sualnak hnga lo ralrin tein kan um peng a hau rih tiah Billy Graham nih a kan fial. Ref: TCP.