Kawl ruahchannak petu Daw Aung San Suu Kyi nih tuzingah kawlram chungah Covid-19 ṭuanvo ngeitu a si bantuk ramchung kip ṭuanvo ngeitu pawl Live video in tuanbia ruahnak Vaupi 24 tuzingah Chin ramkulh aiawh in ṭuanvo ngeitu pawl cu biaruahnak a ngeih hna.

Chin ramkulh chungah Covid-19 mi zaw minung (5) a umnak Tedim khuapi i Covid-19 a zohkhenhtu hna lakah Chinmi minung (3) cu Daw Aung San Suu Kyi chawnh dingin Hakha ah kal dingin khawh auh an si. Cun Tedim Luaibuai khuabawi Vungh Za Cin he minung (5) cu Hakha khuapi an phak hnuah Daw Aung San Suu Kyi chawnhter loin Tedim ah tlunter an si tiah Vapual Auaw nih a tarlangh.

Hi kong he pehtlai in Tedim kan unau cheukhat pawl an thinhung i an lungtling lo ngaingai i “Covid-19 umnak a umnak Tedim mipi nih Daw Aung San Suu Kyi kan chawnh biak hrimhrim a herhmi a si. Kan dirhmun, kan harsatnak hi a ho hmanh nih an kan theihpiak lo i kanmah nih kan theih bik. Cu ruangah Tedim nih Palai kan thlahmi hrimhrim nih Suu Kyi chawn sehlaw kan harsatnak tampi kan chimh khawh lai. Atu ah cun zawtnak zong a um lonak hmun hruaitu le ṭuanvo ngeitu hna nih Suu Kyi cu an chawnh i Tedim dirhmun cu zeihmanh a thei lo lawlaw lai. Voikhat hmanh Tedim ah a um lo i chawkvak bal lomi nih Tedim dirhmun theihhngalh hrimhrim a um lo,” tiah mipi nih an lungtlin lonak cu an chim.

Luaibuai sang khuabawi Vungh Za Cin nih a chimmi cu “Pine hruaitu nih kawlrampi ruahnak petu Aung San Suu Kyi cu video in nan i chawnh bia lai. Hakha ah ra u tiah a kan auh i kan kal. Hakha kan phak hnuah pithawgsuh riahbuk ah a kan chiah i kanmah a kan au tu kan hmu lo. Saupi kan hngah hnuah hotel dangah a kan kalpi ṭhan i zeihmanh tuah loin kan umnak ṭhing hmun ah cun a kan auh ṭhan. Zaanlei suimilam 5:00 Pm hrawngah phone in an kan chawnh i nan lakah a ummI Chinmi (3) hna cu Aung San Suu Kyi he i chawnh dingin cawnnak kan ngei lai tiah a kan ti. Sml 1 hrawng a rauh hnuah nan min ai tel lo, nan duh le kan tlun ṭhan kho tiah an kan chimh,” tiah a chim.

Tuzing i Aung San Suu Kyi nih biaruahnak a ngeihmi sinah a chimmi cu Tedim sizung i a zawmi hna a dang tein chiahnak umnak ding inn cu a si khawh chungin a buaipi ding le lunghrinh in hrenmi hna hna caah an ei ding ti le rawl bawmhnak a pek ding kong a chimh hna tiah Vapual Auaw nih a tarlangh. A tanglei ah video ah Tedim Luaibual sang khuabawi nih thil sining kong chimnak video kan chiah chih i zoh khawh le ngaih khawh asi. Video timi rak hmeh piak law a video um lai.