Atulio ah a linsa ngaimi Myanmar Idol Season 4, Top 8 zuamnak ah Tan Khun Kyaw nih thlahnak sakmi konghe pehtlaiin a sakmi hla nu ngakchia tlaihhremnak hla cu keimah nih ka ttialmi tiah a chim sualmi cu a phuahtu le a satu sinah ngaihthiam halnak le hrilhfiahnak a vun tuah ve tthan cang.

Tan Khun Kyaw nihcun Myanmar Idol Season 4, Top 8 a tlak zaan i thlahnak hla ah ngakchia tlaihhremnak kong hla cu a sak hlante ah ka sak dingmi hla cu ti dingmi ka ttialmi hla cu tiah ai chim sual i amah phuahmi bantukin an thlah manh. Asinain hlaphuahtu Chan Bo nih Offcial tein taza ka cuai lai tiah a facebook a vun thlah ve thlah tthan i, cu konghe pehtlaiin Tan Khun Kyaw nih cun ngaihthiamnak a tuah ve.

Tan Khun Kyaw nih cun “Myanmar Idol thlah zaan i ka sakmi ngakchia tlaihhremnak kong hla cu Chan Bo nih a phuahmi a si i Saw Lah Htaw Wah nih a sakmi asi. Ka sak hlan te ah ka sak dingmi hal cu ti dingmi kha ka ttialmi hal cu tiin ka chim sual. Ka ttialmi asilo i ka phuahmi zong asilo a phuahtu Chan Bo le a satu cu Saw Lah Htaw Wah ngaihthiam kan hal hna hi asi” tiah ngaihthiam a hal hna.

Tan Khun Kyaw nih cun ngaihthiam a hal cang nain tuni, tuchun ahkhan hlaphuahtu Chan Bo nih a facebook taza cuainak konghe pehtlaiin a facebook ah atanglei bantukin a ttial. Chan Bo nih a ttialmi cu” Ngakchia tlaihhremnak kong hla ka phuahmi hi hlasakthiam Saw Lah Htaw Wah lawng saknak nawl ka pekmi asi. Amah sin lawngah phaisa in ka zuarmi asi. Cu ruangah Saw Lah Htaw Wah lo nih amah nawl in a sak, keimah sinah halnak a tuah lo hleiah ka zuahmi Saw Lah Htaw Wah sin zongah saknak nawl a hal hmasa lo. Cucaah phung tein taza ka cuai lai ti kan theihter hna” tiah a facebook ah a tar.