Zei tikah Federal kan ngah lai Ka phuan lai: Tun Myat Naing uartu le Suh Ci uartu tiin nai hrawng cu Laimi kan i țhen ngai ti a si. Salai le Mai upatnak min pek an phu cang ti a si. Tun Myat Naing uartu nih an uarnak bik cu Kawl ralkap cu Laimi tampi nu lo- pa lo- ța lo- far lo- fa lo tiin a kan tuahtu le a kan rialdiptu an si nain US hmanh nih kan phu hlam piak cu chim lo a kan chanh khawh lo lio ah a nih cu fak piin ralkap do tu a si tikah le a ruang dang tampi ah an uar.

Suh Ci uartu bik pawl zong nih an chim ve mi cu a mah loin Federal le Democracy kan hmu kho lai lo. Tlangcungmi a kan dirkamhtu, a si ti le a ruang dang tampi ah an uar ve. Suh Ci loin Federal le Democracy kan hmu kho lai lo ti hi ruah taktak ahcun a mak lo tuk mi a si. Suh Ci a bawi caan kum nga nawn a si cang nain Democracy lei ah kan fong rih lo. A tu ah kum sawm sarih a si cang. Hi hnu kumhra dam tein hei kan bawi piak kho rih seh law zei tluk dah hmai ah a fong lai tiah nan ruah. USDP chan hmanh ah a rang deuh a timi an um. A ngai ngai ahcun Suh Ci hi um hlah seh law, London ah rak um ziar seh law, Democracy kan hmu tuan deuh lai. A zum lomi nan um lai. Ka hngalh cia ko. Nain Ralkap nih Suh Ci an hmuh paoh ah Democracy tuah duh nak lung an ngei lo.

Chim dawh zong a si lo nain fian fawinak ah: an mitkem kan ti lai cu. Southeast Asia ah hin Vietnam hei ti pawl tiang in Communist uknak chia taktak an rak ngei cio hna nain kumkul hrawng a luanciami ah khan an tla dih cang hna. Ziah tiah cun Kawlram bantuk in minung pakhat kha sanghlei cungnung tuk chiahnak chirhchan in a si lo. South Africa zong ah Nelson a um ko ti hlah u, kan boruak aa dang tuk. Cun Nelson zong Suh Ci tluk in an hlirhcuang lo. Ka chimmi hi zumh a phu tuk nain a zumh cu chim lo, a thin a khenhmi zong nan um lai. Nain zoh ko u, Suh Ci nih Ram khel aa tlaih chung paoh cu “No Democracy, No Federal” a si rih ko lai.

Kawl miphun a humzual tuk ruang hna ah Vawlei zong nih an mit a kem tuk cang. A ngai ngai ah Tlangcungmi caah a tuah mi ruangah zei minchiatnak hmanh a hmu rih lo. A tu i a min chiatnak vialte khi Kawl ca le Ralkap rialdip pawl ruang ah a si. Kawl ralkap nih Muslim Rohingya cung le Tlangcungmi sinah nuhrin covo a buar, a sawksam dih nain Suh Ci na dai ziar tiah min chiat an thlaih khi a si. AA kong zong kha ruat ulaw Suh Ci nih pei Cihmih ding in Ralkap order a pek hna kha.

Nan philh cang ma? Zaw Thay nih zei a chim AA kong ah nan philh cang ma? Cu a si komi cu AA nih dirpi a ngah hnga ma? Arakan nih an dirpi kho hnga ma? Laimi cu chim lo KNU lutlai pakhat pa hmanh a molh rua, AA nih dirpimi an i palh ti phun tein bia a chim. “AA an țhawn hnu in NCA thumi a hlei khun in KNU an nahchuah nak zong ka țial bal cang. Confederation kong ah a si. A poi nak cu thluak chiat ruangah a si. Bia hnu hmai kha hngalh camcin a hau, tuanbia le bia le hla pawl kha philh phung a si lo.

Laimi tam deuh zong hi kan thluak a chia tuk i Ramkhel kong kan pemh taktak lomi cu chim lo, mi le mi kar ah bia le hla a ummi pawl philh kan hman tikah a ho deuh dah thil hman a tuah timi zong kan hngal kho lo lengmang. An mah Kawl le Kawl caah cun Ralkap he cun Meheh le Uico bantuk an si ko nain Miphun dang he pehtlai cun dirți an thiam. Nain cu an dirti ruangah Ralkap nih Suh Ci kongah an dirhmun an dorh hlei lo. A mah ning te a si ko. Suh Ci tu nih cun a dirhmun a dorh tuk cang tiah mifim tampi nih an chim.

Suh Ci loin Federal le Democracy kan ngah kho lai lo a timi pawl hi cathiam zong nan si ko tung nain ziah Suh Ci nih kum nga chung ah level pakhat zong hmai ah a kan fon pi khawh tung lo, hi hnu kum zei zat dah nung rih seh nan ti. Nan chim ning ahcun a thih hlan ah Federal a kan tuah piak ta lo ahcun kan ngah thai ti lai lo ti nak pei si ko cu. Zoh hmanh u, ka phuan lai, Federal le Democracy taktak cu Suh Ci um lo tikah fawi chin chin in kan ngah te lai.

Note: zei hmanh hngal loin ka chimmi a si lo. Lai tuanbia lawng si loin Vawlei tuanbia a zatawk ka hngalh pin ah thil pakhat khat kong ah hmuh thiamnak ka ngei rih. Hmailei kong zong ah hmuh khawhnak pahrang Pathian nih a ka pek mi ka si ka ti tawn kha. Vawlei fimnak lawng si loin mu. Ruat cio ko u, “Suh Ci thawng lawng lawng in Federal ti a si ahcun” a lam a um maw? Zei can a nun rih lai? Suh Ci kan i bochan tukmi hi Pathian zong nih rem ti hlah seh law hngalh lo mu. Tuak cio ko uh. Credit: Siang Bawi