Myanmar Idol Season 4 zuamnak ah mipi an duh khunmi le an uar ngaimi Benjamin Sum cu nizaan ah Top 6 zuamnak ah teinak a hmu tthan. Cun hringtu a nu Pi Lal Din Par nih tuan tein Yangon a phak khawh lonak aruang zong mipi sinah chim fiannak le theihternak a tuah ve.

Benjamin Sum hringtu a nu hi nu puitling taktak asi. A pasal le a fanute nih mual an liam taak cang i, cu lio ahcu zawtnak tthalo Cancer nih a rak tlunh rih hoi. Asinain lungdong loin kar ahlang i, a fapa Benjamin Sum caah a ti khawh chuah in a zuam ve i, a donghnak ah cun Pathian thawngin Cancer zong a dammi asi.

Yangon tuante a phak khawh lonak le kal kho lo asinak kong cu hitihin a chim, ” Ka fapa Benjamin Sum nih duhtu le thazaang petu tampi a ngeih ti thawng ka theih ahhin ka lawm tuk hringhran i hmur le kaa nih chim thiam lo dingin tiangin ka lawm. Tuan tein Yangon phak i ka fapa thazaang pek ka duh tuk ko nain, ka ngandamnak a that lo ruangah Yangon ka phak khawh colh lonak asi” tiah a chim.

“Iton lonak zong a sau tuk i kan vun i hmuh cu kan lung a lawm tuk veve i lunglawmhnak mitthli tiang a luang kho. Ben Ben cu a lawmh tuk ruangah holh kho loin a um i, keimah zong cu ve tthiamtthiam cun ka si. Ka fapa ka hmuh lonak a sau tuk tikah ka ngai tuk i, ruah lo piin a tonter kan si ruangah ka holh ve kho i kan nufa in lunglawmhnak mitthli a luang.”

” Nu pakhat dirhmun cun fim cawnnak i ruat hmasa, na lung pe hmasa law tiah ka chimh ve ko. Asinain a thinlung ruahnak le a duhnak ka theih tikah a saknak zongah thazaang ka pek ve. Idol a zuam tik zongah hin thazaang tampi ka pek fawn. Ben Ben cu a tu a um a ning hin inn zongah a ummi asi i, a lawm kho pengmi asi. A tangdor i a lungthin ruahnak a ttha, nulepa upat ttihzah a thia i a biachim holh rel a ralring mi duh a khunnak asi.

” Ben Ben thazaang petu Summer pawl nan cungah lunglawmhnak tampi ka ngei i, hmailei caan zongah thazaang nan peknak lai kan sawm duh tthan hna. An dihlak in anmah pumpak tein kut ttlaih le lawmhbia chim ka duh hna nain, a fawi lomi asi caah hi vial hi lunglawmhnak bia ka chim khawhmi asi” tiah hringtu a nu nih cun a chim. Popular Journal