Speaker, Evangelist Pawl Salaam Peek Bu In An Laam Cang

Sermon

LAAMNAK NIH ZEIDAH A CHUAHPI?

Image result for aung myint thang

Bawipa i i lawmh cu Baibal nih a kan fialmi a si. Bawipa i kan i lawmhnak kan i umpi khawh lo i kan laammi cu lunglomh awk ngaingai a si. Asinain Laimi nih Bawipa ah kan i lawm kan ti i biakin chung i kan laammi nih zeidah a chuahpi, vun zoh hna hmanh uh!

Miriam voikhat a laam nak Baibal ah kan hmuh. David voikhat a laam nak Baibal ah kan hmuh. Pumhnak chungah an laam lo. Pumh chiarte an laam lo. Music a tum i an laammi a si lo. Baibal Biakam Thar Cauk chungah Bawipa ah ai lawm mi an tam lengluang nain a laam mi an um lo. Laimi cu Pathian dawtnak hi hawihlei in a thei mi kan si caah Baibal Biakam Thar chung minung, Paul, Mary, Stephen, Peter te nakin Bawipa ah kan i lawmh deuh caah kan laam khi a si hei ti ko usih! Asi cu a si lo nain mu!

1. Laimi cu laam in kan i thawh i laam ah kan dong lo. Biakin chung i mah tthutnak hmun zawn te i dir i laam in kan rak i thawh. Kan kal vima (developed kan tuah) i mi hmai i chuah i laam ah kan i ttial. Mah tthutnak hmun te i dir i laam kha kan i lungsak kho ti lo i mihmai thengmang te i va laam kha kan uar i kan tuah cang. Hihi 1995 tiang hrawngah Laimi hna an rak laam ning a si.

2. Mihmai i va chuah i va laam sawhsawh zong cu kan i duh tawk ti fawn lo i mi hmai i nuhe pahe a tlik bak i tlik kha atu cu kan hman cang. Hi mihmai i maratun tlik zuam bantuk i Laimi biakin chung i an tlik hi kum 20 a tling rih lo.

3. Mi hmai i a tli mi pawl zong nih khan tlik sawhsawh cu an i lunghmuih ti hoi lo i an speaker, evangelist pawl salaam peek pah bu in an laam cang. Acheu nih an kut hna an i sih i an kut an tleir i a tang in thlarau fale ai timi a cheu cu kut in an ser chommi kutka chungah an lut cang.

4. Evangelist salaam peek le kut kutka sermi tang i luh lawng zong cu an i lungsak ti fawn lo i minung hna an i cit, hri hna in an i hruai cang. Mihmai i sexy taktak i tawttawk hnir laam hna a chuak cang.

5. Acunglei palinak point i ka ttialmi dirhmun zonghi an i lungsak ti hoi lo i, an i duhtawk ti lo i, rock music le disco music bak kha keyboard in thang taktak in an tum hna i evangelist speaker nih Baibal ah a um bak lomi holhtheihlo hla kha an lih bak in an sak pi hna. Mipi kha zuri laam bak in an laam hna. Cucu a ngan bikmi revival ah an chiah.

6. Holhtheihlo hla sak i ttul le laam zong cu an i duh tawk ti fawn lo i acheu cu zapi hmai ah an it i rul bantuk hna in an lawn i pakhat le pakhat an tawttawk hna an i beng pah i Pathian an thangtthat. Biakin chung lu/taw binh hna hi Pathian duhmi ah a ruat i ahmang mi an um cang. Cucu Pathian duhmi ah an ruah ko.

7. Hngakchia no tete Adam sualnak ai hrawn le hrawn lo hmanh a thei rih lo mi, Jesuh nih zeitindah a ka khamh ti hmanh a thei rih lomi hna zong nih an i cawn ve i upa pawl nih an tuahmi kha an tuah ve. Jesuh nih zeitindah a ka khamh ti hmanh a hngal lomi hngakchia cu cu tluk taitai cun Bawipa ah an i lawm kho hnga maw timi hi biahalnak a chuah. Asinain anmah nihcun Thiang Thlarau rianttuannak tthiamtthiam ah an chiah ko.

Laimi cu laam in kan i thawk zongah laam in kan dong lo. Kan kal vima, kan virhkhawh vima i a dongh nak ahcun rul laam in kan laam cang. Lungfim lo zuri hrut laam i laam kha a sang bikmi Thiang Thlarau rianttuannak ah kan chiah cang. Cucaah Jesuh hi atu vawlei ah um rih selaw hitihin bia a chim hnga, “Nannih Laimi cu laam lo tein rak ka thangtthat ko uh” tiah a kan ti ka zumh.

Ref: Dr. Aung Myint Thang

Comment Cheukhat: Lam le holhtheih lo a hmang mi tamdeuh cu lih chim le pamh an hmang thawngtha bia nak in music le lam an uar deuh. BIBLE ah lam ti hi tlawmte a um tam tak tak in an lam BIBLE ah lih a that lo zia tampi a um lih chim lo in le an um kho fawn lo an thin a tawi an puarthak ngai fawn. Kan i lawm saya pa na lung siaherhnak cu BAWIPA nih in thluachuah seh kan mi phun caah le mi kip caah.

Lam khal a pemh laklawh mi nihcun an in huat taktak lai.Lam khal aa pemh cangmi cu zeilo nih asuai tuk cangmi bantuk an si. Pastor le Evan cheukhat an palhnak ve cu,a diklo ti an theih ko bu ah an crusade le camping tuahnak ram bit lai le an menbers untau lai ruahah mah btk hi an cohlan piak tawnmi nih Lairam akhangh biknak asi ve.

Leave a Reply