Naitan ah Malaysia ah inn dot cungin a tlak i a nunnak a liammi nungak Sui Hlei Ṭial cu malaysia in myanmar ram leiah a ruak tlunpi a si. Cuticun an rak tlunpi i, a chuahkehnak Thantlang ah an phak ah, Thantlang Covid-19 Main Committee nawlngeitu hna nih an rak kham hna.

Thantlang khuachung ah luhpi cu chim lo, Thantlan mual ah Lai phung tein a ruak vuiter an si lo. JCB in lamkam ah vawlei an cawh i, cuticun an phumter hna. Chungkhar lei nih nawlnak an tuah hnu hna ah, zaanṭim ah a ruak cu an cawh ṭhan i Thantlang thlanmual ah ṭhial ṭhan a si.

Ramchung, ramleng a ummi Chinmi kan lungfak dih cio. Cun, kan naunau Sui Hlei Ṭial bulhnak caah tiin, ramleng ummi nih bawmhnak tuah piak a si. Bulhnak caah tiin bawmhnak an tuahmi zong a chuakmi a ṭhahnem ngaingai. Bulhnak caah tiin bawmhnak an tuahmi an hmuhmi hi MMK 13,179,342  a si i , tuni 2020 October 17 chun sml. 1:00 ah tlamtling tein a chungkhar sinah peek asi cang.

Tleicia nungak Sui Hlei Ṭial ngaihchiatnak hrawmpinak le bulhnak caah tiin bawmhnak an pekmi kong he pehtlai in The Chinland Post nih hitihin an taar langh,“The Chinland Post nih tleicia Nu Sui Hlei Ṭial (21) caah Ramchung/Ramleng Chin miphun nih ngaihchiatnak hrawmhmi (bulhnak) MMK 13,179,342 cu Hringtu a nu le Chungkhar sin ah tlamtling tein pekchanhnak tuah a si cang.

“2020 October 17 chun sml. 1:00 ah tlamtling tein tuah a si. Thantlang tuah mi pekchannak kong ah felfai deuh in thanh khawh chap kan i zuam lai,” tiah ramchung hrambunh media ngan pakhat a simi The Chinland Post nih cun a taar. Chirhchan: The Chinland Post

Cun, Singapore ah ummi Chinmi (Laimi) hna nih kan naunu Sui Hlei Ṭial bulhnak 1,176,635.48 K an kuat. Hi kong he pehtlai in Nungak Sung Nunu Cinzah nih,“Tuarpinak le Bulhnak-Leng Sui Hlei Tial nih an kan liamtak cu,mi tampi kan thinlung a fak i, kan ngaih zong a chia tuk hringhran. Singapore ummi Mino cheukhat le Lai Seino I Hawikomhnak group i Admin & Moderator team nih,nan ngaihchiat tuarpinak langhter nak caah, Singapore mino cheukhat nih, 976,635.48Ks le Lai Seino i Hawikomhnak group i, Admin & Moderator team nih, 200000Ks A dihlak in 1,176,635.48 Ks cu Cung HuBlood ka pa cung bank acc ah kan rak in kuat cang hna.

“Nan ngaihchiatnak,nan mitthlitlaknak vialte le nan Lungretheihnak vialte, kan in hrawmpi ve hna. BAWIPA nih tuarkhawhnak thazaang thar le Thlawchuahnak he lam in hruai ko hna seh,” tiah a mah pumpak facebook ah a taar.

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan tialmi hi areltu mipi caah thathnem santlaih, theihtlei ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan tialmi kan palhnak a um cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, kan ca a kan rel piaktu nan dihlak cungah kan ilawm. Upatnak he-Admin