Singapore ah sinum rianṭuanmi lengchuah an awnh hna lo. Atu lio zawtnak ṭihnung Coronavirus ruangah singapore i rianṭuanmi (sinum) tampi cu an pu le nih lengchuah an sianh hna lo tiah theih a si. Ngeitu hna nih an inn rianṭuanmi leng chuah an sinah hna lo timi thawngpang lawng hmanh si loin, Singapore i rianṭuami puaisa (Maid Agency) rianṭuantu min langhter lo pakhat nih cun hitihin a chim;

” Atu lio cu nifatin phone in chawnh lengmang ka si i thil dang si loin sinum rianṭuanmi hna inn ngeitu nih lengchuah an sianh lo caah kan chimhpiak tiah timi thawng lawngte a si. Cheukhat inn ngeitu hna nih cun leng a chuah lo man ah tiin $50 kan pek hna lai tiah a titu tiang an um” tiin Chinland Today Media ah a chim.

Singapore acozah nih aluancia kum 2013 thawk khan sinum rianṭuanmi zarhpini fatin (Every sunday off) leng chauh le din caan ah dinhter lo an si ahcun a din lo manh ah $20 pek dingin phung a rak ser. Cucaah inn ngeitu hna nih an sinum rianṭuanmi hna $50 tiang pek an timh hnanak hi a si.

IBC (International Baptist Church) chungtel pakhat nih a chimmi cu ” Kan i pumhnak i kutlaih a si tawnmi kha a tu ahcun kutlaih zong an duh ti lo. Biakinn chung i kan ṭhu cawlh ko. Pumh dih in cuticun kan lawi cio ko hna” tiah a chim. Singapore ah minung 24 hi zawtnak ṭihnung Coronavirus hi an ngei ti a fiang cang i cu lakah cun Indonesia sinum pakhat zong aitel ve tiah theih a si. CTM