Sifaak le Mipem Zong Zawn A Ruatmi Hruaitu Kan Herh: Naite ah Lainu pakhat cu a nu le pa US ah laak a duh hna ii, ka sin ah ruahnak a rak ka hal. Trump a rak ttanh taktakmi asi. Ka theih ziarmi asi. Kawlram visa ban policy kha direct in amah cungah a vun tlaak ve hnu lawngah a lungfiang ii, Trump cu aa kan hloh bak ko, a poi bak ko si. tiah aa ka chimh.

Pakhat pa zong Kawlram ah nupi a tthi. A nupi laaknak a tuah. Kawlram visa ban ruangah fawi le bai ah US a ra kho te lai lo. Trump a ttanh ngaimi asi ve. Cu a uarmi Trump policy nihcun direct in a vun deen ve cang. A lungrethei ngai ve. Zeitindah zaangfahnawlnak (waiver) kha a lam um te hnga maw tiah ruahnak a vun ka hal cia. Trump policy nih direct in amah a vun deen ve hnu lawngah a lungfiang. Pakhat pa cu green card a ngei cangmi asi. Zudin lonak hmun zudin ruangah voithum an tleih cang. Trump a ttanh ngaimi asi. Voi thum case a ngei cang ii, Kawlram ah an ka kua sual te hnga maw tiah a thingphang cia cang. Atu ceo ah Trump policy a lungfiang.

Chim ding tampi a um. Visa ban ralzaam kham, mipeem le sifaak zawn a ruat lomi policy nih aa kan deen tikah ahhin diriam ngai le awl-zaang ngai in bia kan chim sual maw? Atulio hi US sipuaizi a ttha. Rian a tam. Kan rian a sinpi ko ti-in kan hna-ngam tuk sual maw? Kum 2008 ah US sipuaizi faak tuk in a tla. Company tamtuk an khar-rianttuantu tampi an dinh ter (lay off) hna. Rian a rak hartuk. Holh thiamlo ca le bang ahcun rian hmuh a rak har tuk.

US ka phakka ah chungkhar pakhat nih an rak ka chimh balmi cu 2008 US sipuaizi a tlaak lio ahcun kan nupa in ruahlo piin rian aa kan phuah (lay off). Ti-rawl ei-awk kong hmanh ah kan lungre a rak thei tuk. Food Stamp zungah kan va kal ii, ei-awk kan ngei ti lo, tuni bak ah naa kan pek hau tiah kan va chim a ti. Atu cu policy ruangah Food Stamp ngah hmanh a har chin lengmang cang.

Nihin ii US sipuaizi a tthat kan rian a sinpit bantukin hmailei zong asi peng lai, tiah chim khawh asi lo da-kaw. Atulio bantukin sifaak le mipeem zawn a ruat lomi policy nihhin nangmah le na chungkhar zong direct in a vun deen ve caan a phan kho te da-kaw. Cucaah US ahhin sifaak le mipem zong zawn aa kan ruatmi hruaitu kan herh tuk. Pathian nih zeihmanh a tuah khawh lomi a um lo. Atulio kan president Trump thinlung zong a remh kho tu cu Pathian asi. Zuumtu asimi nihcun amah ca zongah thla faakpiin kan campiak ding asi. Credit: Salai Van D Ceu