Naite ah US ah ummi Siang Bawi nih Halkha Nawi Dam tuahnak kong he pehtlai in President U Win Myint sinah cakuat a ṭial. Cu cakuat a ṭialmi cu Chinlandguardian thawngzamhphu nih an page ah le website ah an tarlangh. Laica in tlamtling tein cakuat a ṭialm le a ṭialtu Siang Bawi konglam Thechinlandpost nih an ṭialmi copy tuah in a tanglei ah kan rak tarlang chih.

Nawi Dam tuahnak kongah Siang Bawi nih President U Win Myint sinah cakuat a ṭialmi kong he pehtlai in Nawi Dam tuahnak i khuakhang laireltu (committee member) pakhat a simi Pu Sui Kung (Shwe Koone) nih a facebook nawlcah lo ngaiin ca a ṭialmi kongah Siang Bawi nih a rak tarlangh. A caṭialmi von rel cu lung a nuam lo ngaingai.

Siang Bawi,“Nawi Dam kong ca ka tial ruangah Pu Sui Kung (Shwe Koone) nih hri in awk/thah ding tiah facebook in a ka ti. Boyoke Lam, Biaktonu te inn pawng, Hakha Dawrthar ah a ummi a si. This guy threatened to kill me because I wrote a letter to the President of Burma. Nawi Dam tuah a duhtu pawl nan zia,” tiah Siang Bawi nih a ṭial.

Hi kong he pehtlai in Pu Sui Kung (Shwe Koone) nih hitihin comment a pek ve,“Kabau pa nangmah na tial kha ka thei lo mirang ca na tial mi zong ka hmu lo chin globel network kha mithat lo nak hi tam tuk a tialcm lengmang i mah lio ah nawi dam tuah ding duhlo nak ah president sin ah ca a tial mi a ti i mah hi an lih lawngte an tial hoivko hih a ho nih dah a tial lai ka tivi an um nak ka zoh tik ah Delhi a si mah hna hi thiltha lo an tuah lengnang cei hna seh ka ti i ma ti khan ka tial.ka tial duh mi cu delhi um mi kha an si zei tin dah nangmah sin ah mah hi a phat hi a ruah awk ka thiam lo.nihin chinlandpost ah nahman thlak he na tial mi he ka hmuh i mah ceu khan a tial taktak ko hi ta bia lo pei ka si hi ka ti ka lung a nuam lo na hman thlak ka hmuh tik kan u nau na si kan theih than mah caah cun ka nau pa ka ngai thiam ko nangmah kha kan ti hrimhrim lo delhi lai mi kha ka ti mi hna a si.phundang ah rak ruat hrimhrim hlah globel network hi ka block lengnang ko hna na in pakhat hnu pakhat an chuak i ka block cawk hna lo.an catialhi a tha lo tuk. Mah caah cun ka ngai thiam ko nangmah hrimhrim kha kan ti mi a si lo mu. Ka lawm,” tiah comment a pek.

Siang Bawi nih lehnak a tuahmi cu,“Shwe Koone kan ngaithiam kho lo. Na ngaichih tak fawn lo. Kha bantuk in mi ti phung a si lo—mi zei an si poah ah. Na lung put a tha lo. Ruahnak aa dang cio. Lih an chim ahcun, a dikmi kan dirpi awk a si. Nanmah pawl nih Hakha thanchonak kan tuah lai nan ti cu nan kan hrawh dihnak tu a si lai,” tiah lehnak a tuah.

Siang Bawi nu Pi Hniang Tumnih lehnak a ve ṭhami cu,“ Pu Shwe Koone keimah cu Siang Bawi hring tu a nu ka si kan ngai thiam kho lo (Siang bawi hi a hnawng hri in awh i thlai ding a si Hakha than cho nak a duh lo mi cu hloh dih ding an siko )na ti caah kafa pa na thah a si. Mi zei na si kan hngalh dih. Nawl nak bia na chim mi hi an ka zumh lai tiah ma na ruah fuaituk in ka hlen khoh hna lai tiah rak ruat hlah. Sui Kung kan in ngaithiam lo,” tiah lehnak a tuah.

Thechinlandpost thawngzamhnak nih a ṭ ialmi Siang Bawi sining tlawmpal le President U Win Myint sin cakuat a ṭialmi Copy kan rak tuahmi; Nawi Dam nih Hakha a rawhralter lai “Nawi Dam Will Destroy Hakha” timi tlangtar in US in Siang Lian Sang (Siang Bawi) nih lungtlinlonak ca a kuat tiah theih a si.

Siang Bawi cu US ah B.A., Political Science a dih hnu ah, phungphai (upadi) lei thiamnak ah Doctor of Jurisprudence (JD) a dihmi a si. Mirangca in rel duhmi nih hika ah rel khawh si: Relnak, mirangca in cakuat a tialmi cu The Chinland Post nih Laica in a tlakning in kan rak leh.

Siang Lian Sang (atulio CYONA President) nih Ramkomh Kawlram (Myanmar) President sin ah cakuat tialmi, Chinland Guardian nih Mirangca in langhtermi ah, “Hakha ah tuah dingmi Nawi Dam kong ah ka duhlonak cakuat ka rak tial. Atu timhtuah lio mi Nawi Dam nih mizapi caah thathnemnak um lo in, Hakha a dawhnak a hrawh lai” tiah a cakuat a thawk.

“Hakha ah a thanglianmi ka si i tang 5 le 6 tiang Hakha Saingsangrun (BEHS) no. 1 ah ka rak kai. Kan ngakchiat lio ahcun, Nawi neel cu tlawnlennak, cangai khawihnak le ngahring dawinak ah kan rak hmanmi hmun a si. Hakha ah kokek sinak in a dawh tukmi hmunhma a si i thanchonak nih a hnursuan rihlomi a si” tiah a tial.

Mizapi caah hlawknak um lo in rawhralnak a chuahpi lai, Hakha cu luti luannak tha tein a um kho rih lo, furpi chung ah [Khuapi chung] hmunthur vialte Nawi an an luang, thal chung ah tiva hi a ko dihmi a si fawn.

Cun, Tikham saknak timh hnawh chan zong hi a tak tuanchuah ding ah a si kho lo ding a lo (lettuaih a ciah lo ngai). Tikham sak ding a duhmi nih cun, dinti le nuamnak hmun a si lai an ti. A cunglei langhter cang bantukin, Tikham tuahmi thawng in ti a dilmi cu thurhnawm he a khat lai, amah tein sersiam le roter a um kho ti lai lo. Culeng ah hi Tikham tuah timhmi nih mi innlo le dum tampi a rawkralter lai, an cinthlakmi in a paw aa cawmmi tampi an um, keimah ka rualchan ka ni/nute lila zong cu chung ah an i tel ve.

Tikham saknak kong he pehtlai in ahohmanh nih theilo in a hun cang. Hi sak timhmi Tikham he pehtlai in hlathlainak felte in tuah taktak mi a um rih lo. Cun, ahodah a langlo in biatak tein a nam (cawlcang) timi zong hi fiangfai in a um lo-Chin ramkulh cozah nih maw an tuah a silo ah, a cozah he a pehtlaimi zeimawzat deuh nih dah an tuah. Nawi tiva kiangkap neel a hmunhma hi zapi caah silo in, pumpak hlawknak caah a cang sual lai ti ka phang.

“Cucaah, Nawi Tikham (Dam) saknak timhtuahmi hmunhma le Hakha aa dawhnak a hrawkhraltu men a si lai caah na kan ruah piak thannak lai upatnak he kan nawl” tiah Siang Bawi nih a cakuat a donghter.

Hi Nawi Tikham kong he pehtlai in, Hakha khuachung ah a hngalmi zong an tlawmte i, zeitindah an tuah ningcang, zeitindah cozah lei in timhtuahnak (planning) a um timi hi theih a si lo.

Cakuat tialtu Siang Lian Sang (Siang Bawi) cu US i Fort Worth City ah Attorney (Sihni) a tuan lio mi a si. Cun, pumpak in miphun ca thazaang chuah in riantuannak ah Chin Youth Organization of North Amera (CYONA) ah 2020 July 17 thawk Board President rian an khinh tiah theih a si.

Atutan, Siang Bawi nih Ramkomh Kawlram President U Win Myint sin ah Nawi Tikham kong he cakuat a tialmi cu amah pumpak dirhmun in a sinak cu a cakuat a donghnak ah hmuh khawh a si.

Catialtu Siang L. Sang nih Mirangca in tialmi Chinland Guardian nih langhtermi chung in a tlaknak in lehmi a si. Thechinlandpost ta copy kan tuah chinmi a si.