Saw David Lah an Tuahto nak nih hmuhsak mi Krifa le Krih Muisam. Upadi a buar caah a inntuar ding asi ko nan ti maw cu? Mithat lainawng le fir ruang ah asi lo. Cozah dohdal nak le sandah piah ruang zong ah asi fawn lo. Kasual ballo / ka fir bak lo a timi nih Chep hmasat seh ti si ve sehlaw, Kawlram uktu, a hotal nih, an cheh ngam lai, ka zumh lo.

Hi vialte cozah phaisa a vaivuan le an fir dih mi, Vaw lei theih asi ko ṭung. Vuan thawk in Bahu Mangki bawi vial te tiang, upadi a zulh bak mi le a fir lo bak mi an um lai ka zumh lo. Pumh nak tuah tak tak hlah sehlaw, Kawlram ah Covid19 a um bak lai lo ti bang? Kawl miphun le Kawlram ka daw aa timi; Buda Bada ka dawt aa ti mi; poah nih Ko Saw David Lah a volhpam lo an um lo. Rolung a bunh lo an um lo. Hnawm tiphur bakin an tuah ko.

Pumh nak tuah hlah uh ti asi ko. Kan theih thiam dih ko. Nain Phungki Siang Inn le Metilah Siang Inn ah a bu bu in aum mi hna khi teh? Zeidah an si ve kun? A bu bak in mi lak ah aachok mi Rangon Uktu zik Kui Phio teh? Khoi hme an chiah leh? Rule of law an ti maw cu? Upadi cung ah Ko Saw aum khawh lo btk in! Ziah Kui Phio, Pi Ci le Ralbawi Zik an um ne? Kawl miphun le Kawl cozah cu Tlangcung mi an rem lo cu nan theih cio ko. Krifa le Tlangcung mi asi ko mi nih David Lah kan volh pamh ve mi hi cu a poi kho tuk.

A phung chimh mi le a Theology na pom khawh lo kha cu um ko seh. Pathian thlah mi asi bak lo tiah na ti ngam ve lai maw? Judah mi kan hluan sual lai? Tipil petu Johan cu Judah Tlang bawi hna nih an zumh lo nain profet asi tiah an pomh ko dakaw. Jerico Kri sunpar nak he alut lio Hosana ti tu hna an tli dih. Hlan lio David Lah pawng ah hngerh te zat in a zik mawi mi hna an mui a deh ve ti lo.

Biaknak a thleidan ṭung lo, mipi cozah nan ti hoi maw? Ziah Witrathu cu tlaih khawh tuk asi ko mi? A duh poah in bia achimh an ti maw? Bullet Hla Shwe an tlaih ṭung lo. Khoi hme an thuh le? Paletwa Chin mi thatnawn tu cung ah lawmh nak bia chimh ṭung. Nunnak thawngṭha le Van cung pen nak, chimh phuan tu lehlam sual phawt mi, Mipi cozah? Zei tin dah asi ee?

Saw David Lah le Krifa lawng a limhang a zawr lo. Kan Bawipa Krih hrim hrim kha cikcin in an hren I thirkam chung ah an khumh mi asi. Ramdang ah a tli kho tuk ko nain tlik zam loin aum mi hi ka upat tuk mi asi. Responsibility le Accountability (Tavuan zu hmuh / Tavuan khan hmuh) (Krifa view in cun A sunpar nak kai hrawm btkin a Inntuar nak zong kai hrawm ve ti kha asi) a tlinter.

Kawlram uktu cu Accountability timi Tavuan khan hmuh a ngeih mi aho hmanh an um lo Pi Ci telin. Sun par le cawi san lawng an duh. Inntuar le retheih an zuam hna lo. Abik in an sual palh nak le an firkhut nak ah Tuanvo an lak ngam lo. An santlai lo nak le an si lo nak phuan in ziaza I remh an duh lo. Kha kha Accountability an ngeih lo kan ti nak cu asi.

Kri le thawng ṭha ruang ah taza cuai mi asi caah kal tak duh hlah usih. Jerico a lut lio Hosana tiah kan au btk in: Jerusalem Arkhuang hlan ah voi thum Krih hlawt tu btk si loin, kan tuah kho mi kap cio tal in tei rial in, bawmhchan cio ko hna sih. Innchung khar thlacam nak talin?? Kri nih Sunpar nak a co ṭhan khawh nak hnga, David Lah hmang in. Pathian cu misual ngaithiam tu asi. Taza cuai tu Phungki pa, Kawl cozah le Palik cu a ngai thiam ko hna lai.

Nain Krifa le Krifa phung ki hna zalon nak an ngeih lo mi tu hi, phisin a hau. A ṭemtu hri chat ahau. Fim nak, ṭhawn nak, thazang, ngun sawm, cantiang, meithal, tbk in cu hri cu chat khawh asi ve lo. Ramkhel ah lung rual tein kan ṭang ṭi aherh. Kan Krifa a dam ve cang lai I, Kan Pathian rianṭuan tu hna lungdeih hna ngam tein le zalon tein Bawipa rian thiang, anṭuan khawh cang ve nak hnga, Miphun party ah lungkhat, thinkhat tein kamlo Chuncha bang, dir ve cang hna usih!

Mithiang Paul le Sailas nih, Philipi thong Inn ah Revival an tlung ter bang, Saw David, Pastor Saw Kui Vuah, Evan Saw Rikandi hna Thawng in, Innsein thong Inn le Kawlram Hruaitu hna cung ah Pathian sunpar nak tlung sehlaw, Arau hlan ah luat hram hna seh, Kri BAWIPA thong in, Amen.

Fianternak: Fortify Rights timi Nuhrin covo Rlahau phu lubik Niki Diamond (AA Ralbawizik nupi luat tertu) le Sihni Kyi Myint nih, Mi sual cio cio ah Sual nak an pek dan le an khih dan, an hruai dan, an I dan awk asi lo an ti (Krifa le Duda phungki an chim duh rua). Credit: Saya Rung Kaw

VIDEO timi hmehpiak.