Pu Kyawkyaw thihnak kong he pehtlai in vawlei cung hmun kip um Congthia khuami funtomnak, Global Congthia Network nih cathanh a chuah. Pu Kyaw Myint @ Kyawkyaw Thihnak Kong Cathanh. 1. Pu Kyaw Myint (Kyawkyaw) cu Congthia khuami Pi Ci Pen i a fapa a si i Congthia kan tufa kan unau a si.

2. Sangau khua cu kan Lai khuapi pakhat a si bantuk in a luan cia caan ah Khuachaklei Laimi hartong tampi a rak zohkhenhtu le dirkamh lengmangtu an sinak cungah lunglawmhnak tampi kan ngei. Upatnak zong kan pek hna. 3. Khua le ram runvennak le zohkhenhnak ca ah rian a tuan mi Sangau Young Lai Association (YLA-Sangau) riantuannak kan upat.

4. Asinain, Pu Kyaw Myint (Kyawkyaw) thihnak kong he pehtlai in Sangau-I YLA haotu le a naule tuahsernak cung ah lungtlin lo nak le lungfahnak nganpi kan ngei. A ruang cu I. Kyawkyaw hi nawl a buartu a si zongah phung ning tein dantatnak pek awk a si. Phung ning tein dantatnak pek lo in tili chung ah hramhram in an pilter i nga an charter mi hi nehsawh tuahhram a si tiah kan pom.

II. A damlo i inn hmanh a tlung kho lo mi kha fung in vual dihlak in tukhrem le tikik lak ah ti pilter hnu i kaltaak hi miphun thleidannak a um ruangah hiti an an tuah mi a si tiah kan pom hlei ah, minung covo buar le a hruhrang ngai mi tuahsernak a si tiah kan pom.

III. Postmortem tuah zong a um lo, cozah lei riantuantu fehternak zong um loin lungzawtnak in a thi ti hi zumh awk tlak a si lo i kan cohlang kho hrimhrim lo. IV. Sangnau kiangkap um Congthia khuami nih a ruak an hal ko hna nain a ruak an kan pek duh lo hlei ah hnemhnak bia le hramhnak bia chimh um lo in a hro tu in an rak hrocer hna. Hihi mi zeirello le zomhtaih a si tiah kan ruah pin ah thilfiang a puang lai ti an phan ca ah a si tiah kan cohlan.

V. Sangau-I YLA-haotu le a naule nih kan palh ti an chim duh lo hlei ah phehthuh le anmah thiamconak tu an kawl lengmang. 5. Thil sining kan dothlat lengmang tikah a damlo i inn hmanh a tlung kho lo mi Kyawkyaw hi Sangau-I YLA hoatu le a naule nih hramhram in ti an pilter ruang le an hremnak ruang ah a thihnak a si ko lai tiah lunghniarnak um lo tein kan pom.

Cucaah, Kan tufa, kan unau a si mi Kyawkyaw thihnak kong he pehtlai in Sangau-I YLA tuahsernak cung ah vawleicung khuaza um mi Congthia tefa vialte kan ngaih a chia i kan lung a fak. Pu Pa Cin Thang. (President) Pu Biak Hre (Secretary) Global Congthia Network Global Congthia Network. Ref: The Hakha Post