Nizaan ah Australia ummi Pu Sang Hre nih Salai Lungthli Tum nih Pu No Than Kap kong aṭialmi kongah he pehtlai in a Facebook a timeline ca a thlah. Salai Lungthli Tum nih Comment ah lehnak a tuah ve i midang zong nih lehnak an tuah cio. Salai Lungthli Tum nih lehnak a tuah hnuah Pu Sang Hre nih lehnak a tuah ve ṭhan. Cun, a dang comment Salai Lungthli Tum nih lehnak a tuahmi zong kan rak chiah chih.

Salai Lungthli Tum nih lehnak a tuahmi cu,”Nothankap tuahsernak phuan piak khi Falam huat le doh ah nan ruah khi ka khuaruahhar bikmi a si. Nothankap cu minung pakhat lawng a si, Falam mipi a si lo. Atu khi Chinram hruaitu thim ding kan si, hi lio caan ah hruaitu an tuanbia phuan ngam khi a sual tiah ka ruat bak lo. Midingfel an si maw, hruaitu tha an si maw tiin an tuanbia zoh in zohfel caan a si. A dikmi an tuanbia phuan ngam le phuan khawh kha democracy i a muru a si ko. A dik lomi belte tial awk si hnga lo.

Chin pasaltha tampi an um ko buin tuanbia chia a ngeimi Nothankap thengte Chinmi hruaitu caah thim zong khi a herh tiah ka ruat bak lo. Kan ram a zamtak I ramtha citizen lak hnu ah kan miphun ka daw tiah a aumi cheukhat belte nih cun a tha ko nan ti ko men lai nain,” tiah lehnak a tuah.

Pu Sang Hre nih lehnak a tuah ve ṭhan vemi cu,”Salai Lungthli Tum Tampi nih an in leh cang. No Than Kap hi a uar mi ka si lo. Achiatnak le a thatlonak cu nangmah in let tampi ka thei lai. Zei tik hmanh ah ka uar bal ve lo. Hi hnu hmailei zong ah ka uar hlei lai lo. Personal attacks na tuah mi cu a phung a si ko. Tuah ding zong a si ko. Asinain, na cher mi points le na au pi mi khi miphun fak tuk in kan i dennak kan hma pi a si. Hrial a hau mi a si. Media rian a ṭuan an in ti caah na pa te Pu Zo Bawi khi van thlir ve law a fair ngai le kan in uar ngai hnga,” tiah lehnak a tuah.

Salai Tin Lian Hmung nih hitihin lehnak a tuah ve,”Mahhi Falam le Halkha kar ah remlonak tlaici tuh he aa lo tiah ka comment bal cang. NLD atlinh khawh nak dingah aa zuammi asi. Zeipipa miphun dawt le adik hmanmi tuanbia tial asi bal lai lo.Mi thangchiat hi afawite nain zumtu nun he aa ralchan avoi atam ko cang,” tiah lehnak a tuah.

Salai Lungthli Tum nih Salai Tin Lian Hmung lehnak a tuah ve ṭhanmi cu,”Pathian bia ah ‘na tuh bang na zun lai’ timi a um. Nothankap cu thlaci tha a tuhmi pa asi lo, pengtlang kar thencheunak thlaici a tuhmi a si. Mah pa cu maw Chinram hruaitu caah kan thim ne hnga? Pathian zong nih a kan duhpi lai lo. A sining dik phuan khi Pathian duhmi zong a si lai ka ti,” tiah lehnak a tuah.

Note: Hihi Pu Sang Hre nih Salai Lungthli Tum kong aṭialmi chungin comment kan komhsuatmi a si.