Sami Khua Tam Deuh Nih Khua An Zaam Tak Cang

Chin News

Sami Khuapi Kahdohnak A Fah Ruang Ah Tualchung Mi Dihlak Ngawt In An Zaam. Chin ramkulh thlanglei, Paletwa peng, Sami khuapi ah SAC ralkap pawl nih caan saupi chung an hngah i an um cangnak Byuha sakhan cu Rakhine ralkap AA nih December 14 ni thawk in an kah i kaphnih kar kahdohnak a fah ruang ah tualchung mi dihlak ngawt in ral an zaam hna, tiah chaklei hriamtlai phu unau thum nih December 16 ah an thanh.

Cu sakhan kahdohnak ah cun SAC ralkap nih hriamngan an hman pin ah vanlawng in kahdoh an bawmh hna i kaphnih kar kahdohnak a fah ruang ah tualchung mi cu ral an zaam, tiah hriamtlai phu unau thum nih cun an thanh.

“Sami khuapi chung ralkap Byuha sakhan laak ding in Rakhine ralkap AA nih timhtuahnak an ngeih bang in kaphnih kar kahdohnak a fah ruang ah SAC ralkap nih hriamngan lawng si lo in vanlawng hmang in kahdohnak an tuah,” tiah tualchung mi pakhat nih a chim ve.

Paletwa peng chung um ralkap nih biapi ngai ah an chiahmi Taronai Byuha sakhan le Hnonbu Byuha sakhan cu a luancia December 4 ah Rakhine ralkap AA nih an rak laak khawh. 1027 Operation thawk ni in December 10 tiang ah Paletwa peng chung ralkap sakhan an laakmi telh in Rakhine ramkulh hna ah sakhan 140 leng an laak khawh cangnak kong cu Rakhine ralkap AA nih an langhter.

Leave a Reply