Myanmar Idol Season 4 ah teinak hmutu kan naunu Esther Dawt Chin Sung thil tuahmi cu uar a um kho taktak si. Tuni ah Yangon khuapi ah hmaihuhnak phawtzamhnak a tuah. Hmaihuhnak hi zeiruagah dah a phawt hnga ti ah cun atulio vawlei pi hmanh nih a ṭihmi zawtnak ṭihnung Coronavirus chungin i vennak thil pakhat a si caah tutan ah phawtnak zong ah a si.

Esther nih a chimmi cu ” Zawtnak timi cu ngeih hnu i i zohkhenh nakin ngeih hlan i i ralrin cu thil ṭha bik a si. Mipi in aho ka si an theih kha a biapi lo i Pathian thawngin a tutiang ka dammi hi ka lunglawmhnak ah hmaihuh (Mask) hi ka phawtnak a si. Atu dirhmun Virus (zawtnak) a karh rang tuk i i kilvennak caah ka phawt zamhmi a si. Kawlram ah hmaihuh (Mask) man a kai tuk i micheukhat nih cun an cawk khawh nain, a caw kho lomi tampi an um.

Cun hmaihuhnak (mask) a duh tuk nain a cawk kho lomi an um tibantuk ka theih ruangah ka phawtnak a si i kamkhat lei ah cun Idol ka zuam lioah Vote in thazaang a ka petu mipi caah ka hlutmi a si. Tutan i ka tuahmi thil hi mipi an ka theihnak ding caah ka tuahmi a si lo thinlung dihlak in mipi bawmh ka duh ruang deuh ah a si. Cu ruangah Media lei zong ka sawm hna lo nain Pages i ka tar tikah a theitu an hmutu le theitu an ram um ṭhiamṭhiam.

Cun, tutan i hmaihuhnak (mask) ka phawtmi zong mipi caah ṭhathnemnak petu a si lai tiah ka ruah. Zeiruangah kan ti ahcun zawtnak hi a karh chin lengmang ruangah atu bantukin mipi ka bawmhmi hna cu ka nuam tuk i ka diriam tuk ” tiah Cele Gabar ah a chim.